પાટડીના વડગામ ત્રણ રસ્તા પાસેથી વિદેશી દારૂ ભરેલી એક કાર ઝડપાઈ છે. દસાડા પોલીસે કારમાંથી 432 બોટલ વિદેશી દારૂ અને કાર મળી કુલ રૂ. 3,27,920નો મુદ્દામાલ જપ્ત કર્યો છે. જોકે, કાર ચાલક પોલીસને થાપ આપી ફરાર થઈ ગયો હતો. દસાડા પોલીસ મથકના ઇન્ચાર્જ પીઆઇ વી.આઈ.ખડીયા સહિતનો સ્ટાફ શંખેશ્વરથી દસાડા તરફ દારૂ ભરેલી કાર નીકળવાની હોવાની બાતમીના આધારે પાનવા ત્રણ રસ્તા પાસે વોચ ગોઠવી હતી. પેટ્રોલીંગ દરમિયાન શંકાસ્પદ હાલતમાં નીકળેલી સફેદ કલરની ગાડીને રોકવાનો પ્રયાસ કરતા ચાલક પુરઝડપે નાસી છૂટ્યો હતો. દસાડા પોલીસે ફિલ્મી ઢબે પીછો કરતા કાર ચાલક વડગામ ત્રણ રસ્તા પાસે કાર રસ્તામાં મૂકી સીમ વિસ્તારમાં ફરાર થવામાં સફળ રહ્યો હતો. પોલીસે ગાડીની તલાશી લેતા તેમાંથી જુદી જુદી બ્રાન્ડની વિદેશી દારૂની 432 બોટલો અને બીયર ટીન મળી આવ્યા હતા, જેની કિંમત રૂ. 1,27,920 આંકવામાં આવી છે. કારની કિંમત રૂ. 2,00,000 ગણી કુલ રૂ. 3,27,920નો મુદ્દામાલ જપ્ત કરવામાં આવ્યો છે. દસાડા પોલીસે દારૂ અંગેનો ગુનો નોંધી ફરાર કાર ચાલકને ઝડપી પાડવા વધુ તપાસ હાથ ધરી છે. આ કેસની વધુ તપાસ ઇન્ચાર્જ પીઆઇ વી.આઈ.ખડીયા ચલાવી રહ્યા છે.