વડોદરા શહેરના તરસાલી બાયપાસ નજીકથી વાલીઓ માટે લાલબત્તી સમાન અને હૃદયકાંપાવનારી ઘટના સામે આવી છે. માતાને પ્રસાદ લેવા જવાનું કહીને ઘર બહાર નીકળેલા નાના દિવ્યેશ નામના બાળક સાથે અત્યંત કરુણ અકસ્માત સર્જાયો હતો. બાળક ઘરે પરત ન આવતાં ચિંતિત બનેલા પરિવારજનોએ તેની શોધખોળ આદરી હતી. તપાસ દરમિયાન ત્યાં ઊભેલી એક બસના બંધ થતા દરવાજામાં દિવ્યેશનું ગળું ફસાયેલી અને લટકતી હાલતમાં મળી આવતાં પરિસરમાં અરેરાટી વ્યાપી ગઈ હતી.

બેભાન હાલતમાં બાળકને હોસ્પિટલ ખસેડાયો

બસના દરવાજામાં ગળું ફસાઈ જવાને કારણે શ્વાસ રુંધાવાથી દિવ્યેશ સ્થળ પર જ બેભાન થઈ ગયો હતો. ઘટનાની જાણ થતાં જ પરિવારજનો અને સ્થળ પર એકઠા થયેલા લોકોએ તેને તાત્કાલિક બસના દરવાજામાંથી બહાર કાઢીને સઘન સારવાર અર્થે નજીકની હોસ્પિટલમાં ખસેડ્યો હતો. જોકે, હોસ્પિટલ પહોંચતાં જ ફરજ પરના તબીબોએ બાળકને તપાસીને મૃત જાહેર કર્યો હતો. માસૂમ પુત્રના અચાનક થયેલા કરુણ મોતથી પરિવારજનો પર આભ તૂટી પડ્યું છે અને માતા-પિતાના આક્રંદથી હોસ્પિટલ પરિસર ગમગીન બની ગયું હતું.

પોલીસે ગુનો નોંધી તપાસ હાથ ધરી

ઘટનાની જાણ થતાં જ કપુરાઈ પોલીસ મથકનો કાફલો સ્થળ પર પહોંચી ગયો હતો અને કાયદેસરની કાર્યવાહી શરૂ કરી હતી. કપુરાઈ પોલીસે આ હચમચાવી નાખતી દુર્ઘટના અંગે અકસ્માતે મોતનો ગુનો નોંધી આગળની તપાસ હાથ ધરી છે. બસ ત્યાં કયા સંજોગોમાં ઊભી હતી અને દરવાજામાં ગળું કેવી રીતે ફસાયું તે અંગે પોલીસ દ્વારા આસપાસના સીસીટીવી ફુટેજ અને પ્રત્યક્ષદર્શીઓની પૂછપરછ કરવામાં આવી રહી છે. આ ઘટનાએ બાળ સુરક્ષા અને વાલીઓની સતર્કતા અંગે ગંભીર સવાલો ઊભા કર્યા છે.