સુરત જિલ્લાની અત્યંત મહત્વની ગણાતી કામરેજ સુગર ફેક્ટરીની ચૂંટણીના પરિણામો સામે આવી ગયા છે, જેમાં સહકાર પેનલે ભવ્ય વિજય નોંધાવ્યો છે. પરિણામો જાહેર થતાં જ સુગર ફેક્ટરીના સભાસદો અને વિજેતા પેનલના સમર્થકોમાં ભારે ઉત્સાહ જોવા મળ્યો હતો. ચૂંટણીમાં પોતાની પેનલનો દબદબો સ્થાપિત થયા બાદ કાર્યકરો દ્વારા જીતનો જશ્ન મનાવવાનું શરૂ કરવામાં આવ્યું હતું. જોકે, આ ઉજવણી અને ખુશીના માહોલ વચ્ચે એક વિવાદાસ્પદ ઘટના પણ સામે આવી છે.

પીપોદરા ઝોનના ઉમેદવાર ઉત્સાહમાં ભાન ભૂલ્યા

કામરેજ સુગર ફેક્ટરીની આ ચૂંટણીમાં પીપોદરા ઝોનમાંથી સહકાર પેનલના ઉમેદવાર અફઝલ પઠાણ વિજેતા જાહેર થયા હતા. પરિણામ બાદ જીતની ખુશી અને અતિ ઉત્સાહમાં વિજેતા ઉમેદવાર અફઝલ પઠાણ પોતાનું ભાન ભૂલી ગયા હતા. પરિણામ જાહેર થયા બાદ જાહેરમાં જ અફઝલ પઠાણે અશ્લીલ ઈશારો કર્યો હોવાની ઘટના સામે આવી છે. ચૂંટાયેલા પ્રતિનિધિ દ્વારા કરવામાં આવેલા આવા અશોભનીય વર્તનને કારણે સ્થાનિક લોકો અને અન્ય ઉમેદવારોમાં ભારે આશ્ચર્ય અને નારાજગી જોવા મળી રહી છે.

વિજય સરઘસ દરમિયાન અશ્લીલ ઈશારો કરતા વિવાદ

ચૂંટણી પરિણામો બાદ ઢોલ-નગારા સાથે નીકળેલા વિજય સરઘસ દરમિયાન પણ અફઝલ પઠાણે જાહેરમાં અશ્લીલ ઈશારો કર્યો હતો. વિજય સરઘસમાં હાજર લોકોની સામે જ કરવામાં આવેલા આ અયોગ્ય વર્તનનો મુદ્દો હવે ટોક ઓફ ધ ટાઉન બન્યો છે. લોકશાહી પ્રક્રિયા દ્વારા જવાબદાર પદ પર ચૂંટાયેલા ઉમેદવારનું જીતના જશ્નમાં આવું આચરણ જાહેર જીવનની મર્યાદાઓ પર સવાલ ઉભા કરે છે અને આ મામલે ભારે રોષ જોવા મળી રહ્યો છે.

આ પણ વાંચો : Gandhinagar News : રત્નકલાકારોના શોષણ સામે ડાયમંડ વર્કર યુનિયન આક્રમક, યોગ્ય મજૂરી માટે સરકારને રજૂઆત