ગાંધીનગર મહાનગરપાલિકા વિસ્તારમાં ચાલુ ચોમાસા દરમિયાન આશરે 6.5 કિલોમીટર જેટલા રસ્તાઓ ખરાબ થઈ જતાં વાહનચાલકો અને નાગરિકોને હાલાકીનો સામનો કરવો પડી રહ્યો હતો. આ સમસ્યાના ઉકેલ અર્થે ગાંધીનગર કોર્પોરેશનની સ્ટેન્ડિંગ કમિટીની મહત્વપૂર્ણ બેઠક યોજાઈ હતી. આ બેઠકમાં ચોમાસામાં બગડેલા રસ્તાઓની તાકીદે મરામત કરવા માટે રૂ. 66 લાખના કામોને મંજૂરી આપવામાં આવી છે. ખરાબ થઈ ગયેલા રસ્તાઓ પર પ્રાથમિક ધોરણે વેટ મિક્સ પાથરીને વાહનવ્યવહાર માટે સુરક્ષિત બનાવવા નિર્ણય લેવાયો છે.
સ્ટેન્ડિંગ કમિટીમાં 35 મુદ્દા અને વિવિધ નીતિ વિષયક બાબતો પર ચર્ચા
ગાંધીનગર મહાનગરપાલિકાની આ સ્ટેન્ડિંગ કમિટીની બેઠકમાં શહેરના વિકાસ અને નાગરિક સુવિધાઓને લગતા અલગ અલગ 35 જેટલા મહત્વના મુદ્દાઓ પર વિગતવાર ચર્ચા-વિચારણા કરવામાં આવી હતી. આ બેઠક દરમિયાન 4 જેટલા નવા ટેન્ડર અને 9 જેટલી નીતિ વિષયક બાબતોને આવરી લઈને જરૂરી નિર્ણયો લેવામાં આવ્યા હતા. શહેરના વિવિધ વિસ્તારોમાં આંતરમાળખાકીય સુવિધાઓને મજબૂત કરવા તેમજ ચોમાસા દરમિયાન ઊભી થયેલી સમસ્યાઓનો ઝડપી ઉકેલ લાવવા પર વિશેષ ભાર મૂકવામાં આવ્યો હતો.
સીસી રોડ અને ડ્રેનેજ સિસ્ટમ માટે રૂ. 39 કરોડના ટેન્ડર મંજૂર
આ બેઠકમાં રસ્તા રિપેરીંગ ઉપરાંત શહેરની માળખાકીય સુવિધાઓના અપગ્રેડેશન માટે કુલ રૂ. 39 કરોડની કિંમતના ટેન્ડરોને પણ લીલી ઝંડી આપવામાં આવી હતી. જેમાં શહેરના વિવિધ સેક્ટરો અને આસપાસના વિસ્તારોમાં નવા સીસી રોડ બનાવવા તેમજ ડ્રેનેજ સિસ્ટમને વધુ સુદ્રઢ બનાવવાના ટેન્ડરો મંજૂર કરવામાં આવ્યા છે. કોર્પોરેશનના આ નિર્ણયથી ગાંધીનગરના રહીશોને ખરાબ રસ્તાઓ અને પાણીના નિકાલની સમસ્યામાંથી મોટી રાહત મળશે.
આ પણ વાંચો : Bhavnagar News : જેસરમાં મોડી રાત્રે દીપડાની લટાર, પેટ્રોલ પંપના CCTVમાં કેદ થયો દીપડો…