એન્ફોર્સમેન્ટ ડિરેક્ટોરેટ (ED)ના નાગપુર સબ-ઝોનલ કાર્યાલય દ્વારા 18 ઓગસ્ટ, 2026ના રોજ નાગપુર, ગોંદિયા અને અમદાવાદમાં કુલ 12 સ્થળોએ મોટા પાયે સર્ચ ઓપરેશન હાથ ધરવામાં આવ્યું હતું. પ્રિવેન્શન ઓફ મની લોન્ડરિંગ એક્ટ (PMLA) હેઠળ આ કાર્યવાહી ઓનલાઈન ગેમિંગ અને બેટિંગના નામે આચરવામાં આવેલા કરોડો રૂપિયાના ફ્રોડ તથા મની લોન્ડરિંગ નેટવર્કની તપાસના ભાગરૂપે કરવામાં આવી હતી. આ દરોડા મુખ્ય સૂત્રધાર અનંત નવરત્ન જૈન ઉર્ફે સોન્ટુ જૈન અને તેના સાગરીતોના રહેણાંક તેમજ વ્યાપારી પરિસરો પર પાડવામાં આવ્યા હતા. નકલી એપ્સ અને ટેકનિકલ ગ્લિચ ઊભા કરી 58.42 કરોડની છેતરપિંડી
નાગપુર સાયબર ક્રાઈમ પોલીસ સ્ટેશનમાં નોંધાયેલી FIRના આધારે શરૂ થયેલી તપાસમાં સામે આવ્યું છે કે સોન્ટુ જૈને ફરિયાદીને ટૂંકા ગાળામાં ઊંચા વળતરની લાલચ આપી ઓનલાઈન ગેમિંગમાં કરોડો રૂપિયાનું રોકાણ કરાવ્યું હતું. ફરિયાદીને Diamondexch, Indianexch, Lotusbook અને World777 સહિતના ગેરકાયદે ગેમિંગ પ્લેટફોર્મની લિંક્સ આપવામાં આવતી હતી. આ પ્લેટફોર્મ્સને એવી રીતે મેનિપ્યુલેટ કરવામાં આવ્યા હતા કે ફરિયાદી જ્યારે પણ જીતની સ્થિતિમાં પહોંચે ત્યારે જાણીજોઈને સિસ્ટમમાં ટેકનિકલ એરર ઊભી કરી જીતેલી રકમ અટકાવી દેવામાં આવતી હતી. આ મોડસ ઓપરેન્ડી દ્વારા ફરિયાદી સાથે અંદાજે 58.42 કરોડ રૂપિયાની જંગી છેતરપિંડી આચરવામાં આવી હતી. હવાલા, મ્યુલ એકાઉન્ટ્સ અને વિદેશમાં પૈસાની હેરાફેરી
EDની તપાસમાં બહાર આવ્યું છે કે ગેમિંગ ફ્રોડમાંથી મેળવેલી રકમ મેળવવા માટે હવાલા નેટવર્ક, ટોકન કરન્સી નોટ અને કુરિયર મારફતે રોકડ વ્યવહારો કરવામાં આવતા હતા. આ ઉપરાંત વિવિધ ડમી વ્યક્તિઓ અને સંસ્થાઓના નામે ખોલાવાયેલા અનેક મ્યુલ બેંક એકાઉન્ટ્સ દ્વારા લેયરિંગ કરવામાં આવતું હતું. એકાઉન્ટ્સના વિશ્લેષણમાં કરોડો રૂપિયાના મોટા પાયે વ્યવહારો મળી આવ્યા છે, જેમાં રોકડ ઉપાડ ઉપરાંત બોગસ ઈમ્પોર્ટ પેમેન્ટ દર્શાવીને નાણાં ગેરકાયદેસર રીતે વિદેશ મોકલવામાં આવ્યા હોવાનું પણ સામે આવ્યું છે. 100થી વધુ ખાતા ફ્રીઝ અને લક્ઝરી વાહનો કબ્જે
સર્ચ ઓપરેશન દરમિયાન ED દ્વારા 30.30 લાખ રૂપિયાની રોકડ રકમ, 2 બેંક લોકર્સ અને 1.70 કરોડ રૂપિયાની કિંમતના 3 લક્ઝરી વાહનો જપ્ત કરવામાં આવ્યા છે. આ ઉપરાંત 5 કરોડ રૂપિયાની બેલેન્સ ધરાવતા 100 થી વધુ બેંક ખાતા, મ્યુચ્યુઅલ ફંડ અને શેર્સ ફ્રીઝ કરવામાં આવ્યા છે. ડિજિટલ પુરાવા માટે 11 મોબાઈલ ફોન અને 1 લેપટોપ કબજે કરાયા છે, તેમજ 16.50 કરોડ રૂપિયાની સ્થાવર મિલકતો સંબંધિત શંકાસ્પદ દસ્તાવેજો મળી આવ્યા છે, જેના આધારે એજન્સી દ્વારા વધુ ઊંડાણપૂર્વક તપાસ ચલાવવામાં આવી રહી છે.