દાહોદ જિલ્લામાં લાંબા સમયના વિરામ બાદ ફરી એકવાર હવામાનમાં પલટો આવ્યો છે અને મેઘરાજાએ મહેર કરી છે. છેલ્લા કેટલાક દિવસોથી અસહ્ય ઉકળાટ અને બફારાથી ત્રસ્ત દાહોદવાસીઓને વરસાદી ઝાપટાં પડતાં મોટી રાહત મળી છે. દાહોદ શહેર તેમજ તેની આસપાસના ગ્રામ્ય વિસ્તારોમાં આકાશ કાળાડીબાંગ વાદળોથી ઘેરાયું હતું અને ત્યારબાદ ધીમીધારે ઝરમર વરસાદ શરૂ થયો હતો. લાંબા સમયાંતરે વરસાદનું આગમન થતાં જ સમગ્ર પંથકના વાતાવરણમાં અચાનક આહલાદક ઠંડક પ્રસરી ગઈ છે.
લોકોને ઉકળાટમાંથી મુક્તિ મળી
શહેરમાં સવારથી જ વાદળછાયું વાતાવરણ બન્યા બાદ ધીમીધારે વરસાદ વરસવાનું શરૂ થયું હતું. જેના કારણે રસ્તાઓ ભીના થઈ ગયા હતા અને વાતાવરણમાં સાર્વત્રિક ઠંડક પ્રસરતાં લોકોએ ગરમીમાંથી રાહત અનુભવી હતી. વરસાદી માહોલને પગલે વાતાવરણ રોમાંચક બની ગયું હતું અને નીચાણવાળા તેમજ ખુલ્લા વિસ્તારોમાં પાણીના નાના-મોટા ખાબોચિયાં ભરાયાં હતાં. હવામાન વિભાગના જણાવ્યા અનુસાર આગામી કલાકોમાં પણ હળવાથી મધ્યમ વરસાદી ઝાપટાં પડે તેવી સંભાવના વ્યક્ત કરવામાં આવી છે.
વરસાદથી ખેડૂતોમાં ખુશીનો માહોલ
લાંબા સમયના વિરામ બાદ પડેલો આ વરસાદ ખેતી માટે અત્યંત ફાયદાકારક સાબિત થશે. ચોમાસાના આરંભે વાવણી કર્યા બાદ વરસાદ ખેંચાતાં ખેડૂતોના જીવ અદ્ધર થઈ ગયા હતા અને પાક સૂકાવાની ભીતિ સેવાઈ રહી હતી. પરંતુ બરાબર સમયે જ મેઘરાજાએ પુનઃ પધરામણી કરતાં ઊભા પાકને જીવનદાન મળ્યું છે. આ વરસાદ ખેતરોમાં લહેરાતા પાક માટે અમૃત સમાન સાબિત થતાં જ દાહોદ જિલ્લાના ધરતીપુત્રો અને ખેડૂત આલમમાં ખુશી અને આનંદની લહેર ફરી વળી છે.