અદાણી ગ્રુપના ચેરમેન ગૌતમ અદાણીએ બેંગલુરુના સદાશિવનગર સ્થિત કર્ણાટકના નાયબ મુખ્યમંત્રી ડી.કે. શિવકુમારના નિવાસસ્થાને તેમની સાથે શુભેચ્છા મુલાકાત કરી હતી. કનકપુરા રોડ સ્થિત આર્ટ ઓફ લિવિંગ ઇન્ટરનેશનલ સેન્ટરની મુલાકાત બાદ એરપોર્ટ જતી વખતે આ બેઠક યોજાઈ હતી. આ મુલાકાત અંગે સ્પષ્ટતા આપતા શિવકુમારે જણાવ્યું હતું કે, આ માત્ર એક શિષ્ટાચાર મુલાકાત (Courtesy Call) હતી અને તેમાં કોઈ વ્યાપારી કે પ્રોજેક્ટ સંબંધિત મુદ્દા પર ચર્ચા થઈ નથી. તેમણે ઉમેર્યું હતું કે અદાણી ગ્રુપ લાંબા સમયથી એપોઇન્ટમેન્ટ માંગી રહ્યું હતું અને તેઓ કર્ણાટકમાં અગાઉથી જ રિન્યુએબલ એનર્જી, સિમેન્ટ ઉત્પાદન, થર્મલ પાવર પ્લાન્ટ અને મંગલુરુ એરપોર્ટ જેવા વિવિધ ક્ષેત્રોમાં મોટું રોકાણ ધરાવે છે.

ભાજપના પ્રહારો અને કોંગ્રેસનું રાજકીય ‘બેવડું વલણ’

આ મુલાકાત સામે આવતા જ રાજ્યના રાજકારણમાં ગરમાવો આવી ગયો છે અને કર્ણાટક વિધાનસભાના વિરોધ પક્ષના નેતા આર. અશોકે કોંગ્રેસ પર તીખા પ્રહારો કર્યા છે. તેમણે સવાલ ઉઠાવ્યો હતો કે શું કોંગ્રેસ નેતા રાહુલ ગાંધીએ શિવકુમારને ગૌતમ અદાણીને મળવાની પરવાનગી આપી હતી? કોંગ્રેસ દિલ્હીમાં અદાણી ગ્રુપનો સતત વિરોધ કરે છે અને કર્ણાટકમાં તેમના માટે ‘રેડ કાર્પેટ’ પાથરે છે, જે તેમનું સ્પષ્ટ બેવડું વલણ દર્શાવે છે. આ સાથે જ, સૂચિત ટનલ રોડ પ્રોજેક્ટ સામે ભાજપના સાંસદ તેજસ્વી સૂર્યાએ પણ સખત વિરોધ નોંધાવ્યો છે અને આ યોજના સામે કર્ણાટક હાઈકોર્ટના દરવાજા ખટખટાવ્યા છે.

બેંગલુરુ ટનલ રોડ પ્રોજેક્ટ અને અદાણી ગ્રુપની બિડ

આ ચર્ચાસ્પદ મુલાકાત એવા સમયે થઈ છે જ્યારે અદાણી એન્ટરપ્રાઈઝીસ લિમિટેડ (AEL) સેન્ટ્રલ સિલ્ક બોર્ડથી હેબ્બાલ વચ્ચેના 16.75 કિલોમીટર લાંબા ટનલ રોડ પ્રોજેક્ટ માટે સૌથી ઓછી બોલી લગાવનાર (L1) કંપની તરીકે સામે આવી છે. રાજ્ય સરકારે આ પ્રોજેક્ટનો અંદાજિત ખર્ચ રૂ. 17,698 કરોડ નક્કી કર્યો હતો, જ્યારે અદાણી ગ્રુપે રૂ. 22,267 કરોડની બોલી લગાવી છે, જે મૂળ અંદાજ કરતાં આશરે રૂ. 4,600 કરોડ વધુ હોવાથી કેબિનેટ મંજૂરી જરૂરી બની છે. મોડિફાઈડ BOOT (બિલ્ડ, ઓન, ઓપરેટ એન્ડ ટ્રાન્સફર) મોડેલ હેઠળ બનનારા આ પ્રોજેક્ટમાં 40 ટકા ફંડિંગ સરકાર આપશે, જ્યારે બાકીનો ખર્ચ અદાણી ગ્રુપ 30 વર્ષના ગાળામાં વસૂલશે.

આ પણ વાંચો : Delhiમાં 24-25 ઓગસ્ટે નેશનલ સિક્યુરિટી સ્ટ્રેટેજી કોન્ફરન્સ યોજાશે, અમિત શાહ રહેશે ઉપસ્થિત