Surat ક્રાઈમ બ્રાન્ચે 27 વર્ષથી ફરાર અને રૂ.90 હજારની ખંડણી વસૂલનાર આરોપીની મધ્યપ્રદેશથી કરી ધરપકડ

સુરત ક્રાઈમ બ્રાન્ચે વર્ષો જૂના અને અણઉકેલાયેલા ગુનાઓમાં મોટી સફળતા મેળવી છે. અપહરણ, ખંડણી અને આર્મ્સ એક્ટ જેવા ગંભીર ગુનાઓમાં છેલ્લા 27 વર્ષથી ફરાર રહેલા આરોપી રામગોપાલ ઉર્ફે ગોપાલ ભરત રાઠોડને પોલીસે ઝડપી પાડ્યો છે. ક્રાઈમ બ્રાન્ચની ટીમે ચોક્કસ બાતમી અને ટેકનિકલ સર્વેલન્સના આધારે મધ્યપ્રદેશના મુરૈના ખાતે સઘન દરોડો પાડી આ રીઢા ગુનેગારની ધરપકડ કરી છે.

વર્ષ 1996નો અપહરણ અને ખંડણીનો બનાવ 

આ ઘટનાની વિગત મુજબ, વર્ષ 1996માં આરોપી રામગોપાલ રાઠોડે જમીન સંબંધિત જૂની અદાવત રાખીને ફરિયાદીનું અપહરણ કર્યું હતું. અપહરણ કર્યા બાદ તેણે ફરિયાદીને ચપ્પુની અણીએ ધાકધમકી આપીને ભયનો માહોલ ઊભો કર્યો હતો અને રૂ.90,000ની જંગી ખંડણી વસૂલ કરી લીધી હતી. આ સનસનાટીભરી ઘટના બાદ આરોપી પોલીસથી બચવા માટે રાજ્ય બહાર નાસી છૂટ્યો હતો.

સુરત ક્રાઈમ બ્રાન્ચની સફળ કામગીરી 

બનાવ અંગે સુરત ક્રાઈમ બ્રાન્ચ પોલીસ સ્ટેશનમાં આરોપી વિરુદ્ધ ગુનો નોંધવામાં આવ્યો હતો. આરોપી છેલ્લા 27 વર્ષથી પોતાની ઓળખ છુપાવીને અલગ-અલગ સ્થળોએ આશ્રય લઈ રહ્યો હતો. સુરત ક્રાઈમ બ્રાન્ચે સતત પીછો ચાલુ રાખી અંતે મધ્યપ્રદેશથી તેને કાયદાના શિકંજામાં લીધો છે, જેનાથી વર્ષો જૂના ગંભીર ગુનાનો ઉકેલ આવ્યો છે.

ગુજરાતના વધુ સમાચાર વાંચવા માટે ક્લિક કરો