ગોધરા તાલુકામાં બે અલગ-અલગ ઘટનાઓ નોંધાઈ છે. એક ઘટનામાં કોદરીયા રોડ પર બાઇકચાલકે એક મહિલાને અડફેટે લેતા ગંભીર ઇજાઓ થઈ છે. જ્યારે બીજી ઘટનામાં ગોધરા SRP ગ્રુપ-05ના 31 વર્ષીય યુવાનનું એસિડ પીધા બાદ સારવાર દરમિયાન મૃત્યુ થયું છે. કોદરીયા ગામના ઠાકોર ફળિયામાં રહેતા સુમિત્રાબેન ધર્મેન્દ્રસિંહ પરમાર ખેતરમાંથી ઘાસ લઈને કોદરીયાથી ખીલોડી તરફ જઈ રહ્યા હતા. તે સમયે પૂરઝડપે અને ગફલતભરી રીતે આવી રહેલા એક બાઇકચાલકે તેમને સામેથી ટક્કર મારી હતી. આ અકસ્માતમાં સુમિત્રાબેનને હાથ, પગ અને છાતીના ભાગે ગંભીર ઇજાઓ પહોંચી હતી. અકસ્માત સર્જી બાઇકચાલક વાહન સાથે ઘટનાસ્થળેથી ફરાર થઈ ગયો હતો. ઇજાગ્રસ્ત મહિલાને તાત્કાલિક સારવાર માટે હોસ્પિટલ ખસેડવામાં આવ્યા હતા. આ મામલે ગોધરા તાલુકા પોલીસે ગુનો નોંધી વધુ તપાસ હાથ ધરી છે. બીજી ઘટનામાં, ગોધરા શહેરના લુણાવાડા રોડ પર આવેલા SRP ગ્રુપ-05 પરિસરમાં રહેતા કમલકુમાર મહેશકુમાર લાલવાણી (ઉં.વ. 31) એ 24 ઓગસ્ટની રાત્રે પોતાના નિવાસસ્થાને એસિડ પી લીધું હતું. ઘટનાની જાણ થતાં તેમને 108 એમ્બ્યુલન્સ મારફતે ગોધરા સિવિલ હોસ્પિટલ લઈ જવામાં આવ્યા હતા. પ્રાથમિક સારવાર બાદ તેમને વધુ સારવાર માટે વડોદરાની એસ.એસ.જી. હોસ્પિટલમાં રિફર કરાયા હતા. જ્યાં આજે વહેલી સવારે સારવાર દરમિયાન તેમનું મૃત્યુ નિપજ્યું હતું. આ બનાવ અંગે ગોધરા શહેર બી ડિવિઝન પોલીસે એ.ડી. (એક્સિડેન્ટલ ડેથ) નોંધી આગળની તપાસ શરૂ કરી છે.