સુરત મહાનગરપાલિકામાં ડેપ્યુટી કમિશનરની ચાવીરૂપ અને મહત્ત્વપૂર્ણ જગ્યાઓ ભરવાની પ્રક્રિયામાં રાજ્ય સરકારે મોટો ફેરફાર સૂચવ્યો છે. પાલિકા પ્રશાસન દ્વારા ડેપ્યુટી કમિશનરની તમામ જગ્યાઓ માત્ર સીધી ભરતીથી ભરવાનો નિર્ણય લેવામાં આવ્યો હતો, જેને રાજ્ય સરકારના શહેરી વિકાસ વિભાગે ફગાવી દઈ નવી ત્રિસ્તરીય ફોર્મ્યુલા લાગુ કરવા આદેશ કર્યો છે. આ સુધારા મુજબ હવે 50 ટકા જગ્યાઓ સીધી ભરતીથી, 25 ટકા જગ્યાઓ બઢતી (પ્રમોશન) દ્વારા અને બાકીની 25 ટકા જગ્યાઓ પ્રતિનિયુક્તિ (ડેપ્યુટેશન)થી ભરવાની જોગવાઈ કરવામાં આવી છે. ભરતીના નિયમો અને લાયકાતોમાં ફેરફારની દરખાસ્ત તૈયાર
શહેરી વિકાસ વિભાગના સૂચિત માપદંડોને આધારે મહાનગરપાલિકાએ સામાન્ય સભાના ઠરાવ ક્રમાંક 103/2026ના અનુસંધાને ભરતીના નિયમો અને લાયકાતોમાં ફેરફાર કરતી નવી દરખાસ્ત તૈયાર કરી છે, જેને અંતિમ મંજૂરી માટે સ્થાયી સમિતિ સમક્ષ રજૂ કરવામાં આવી છે. અગાઉ મનપા દ્વારા સીધી ભરતી માટે કોઈપણ શાખામાં અનુસ્નાતક અથવા સ્નાતક સાથે CA, ICWA, CS કે MBA જેવી ઉચ્ચ વ્યાવસાયિક લાયકાત નક્કી કરાઈ હતી. જોકે રાજ્ય સરકારે નિયમો હળવા કરીને માન્ય યુનિવર્સિટીમાંથી માત્ર સ્નાતકની લાયકાત રાખવા જણાવ્યું છે, સાથોસાથ અનુભવના માપદંડોમાં પણ સુધારો કરવામાં આવ્યો છે. 7 વર્ષનો અનુભવ ધરાવતા અધિકારીઓને સ્થાન મળશે
આ નવી ભરતી નીતિ હેઠળ મનપાના અનુભવી અધિકારીઓને કારકિર્દીમાં આગળ વધવાની મોટી તક મળશે. બઢતીના 25 ટકા ક્વોટામાં પાલિકાના આસિસ્ટન્ટ મ્યુનિસિપલ કમિશનર તરીકે ઓછામાં ઓછો 7 વર્ષનો અનુભવ ધરાવતા અધિકારીઓને સ્થાન આપવામાં આવશે, જોકે તેમણે નિર્ધારિત શૈક્ષણિક લાયકાત પૂર્ણ કરવાની રહેશે. આ ઉપરાંત ડેપ્યુટેશન હેઠળના 25 ટકા ક્વોટામાં રાજ્ય સરકારના IAS અથવા GAS કેડરના અનુભવી ક્લાસ-1 અધિકારીઓની નિયુક્તિ કરવામાં આવશે. આ સુધારા લાગુ થવાથી મનપાના વહીવટમાં સ્થાનિક અનુભવી સ્ટાફની સાથે રાજ્ય સરકારના વહીવટી અધિકારીઓનો સમન્વય જોવા મળશે, જેનાથી પાલિકાના વહીવટી તંત્રને નવી ગતિ અને કાર્યક્ષમતા મળશે.