આજે સમગ્ર દેશમાં ભાઈ-બહેનના પવિત્ર પ્રેમ અને સ્નેહના પ્રતીક સમાન રક્ષાબંધનના પર્વની હર્ષોલ્લાસ સાથે ઉજવણી કરવામાં આવી રહી છે. આ ખાસ પ્રસંગે મહેસાણા જિલ્લા જેલ ખાતે પણ જેલમાં બંધ કેદી ભાઈઓને તેમની બહેનો રાખડી બાંધી શકે તે માટે વિશેષ અને સુંદર વ્યવસ્થા કરવામાં આવી હતી. જેલમાં સજા કાપી રહેલા પોતાના ભાઈઓને મળવા અને રક્ષાકવચ બાંધવા માટે વહેલી સવારથી જ મોટી સંખ્યામાં બહેનો જેલ પરિસરમાં ઉમટી પડી હતી. લાંબા સમય પછી ભાઈને પોતાની સમક્ષ જોઈને અનેક બહેનોની આંખોમાં હરખના આંસુ અને ખુશી છલકાઈ ઉઠી હતી. બહેનોએ શાસ્ત્રોક્ત વિધિ મુજબ ભાઈઓને કંકુ-તિલક કરી, હાથ પર રાખડી બાંધીને મોં મીઠું કરાવ્યું હતું અને ભાઈના દીર્ઘાયુની પ્રાર્થના કરી હતી. મહેસાણા જિલ્લા જેલમાં હાલ કુલ 330 જેટલા કેદીઓ બંધ છે. તહેવારના દિવસે મુલાકાતે આવતી બહેનોને કોઈ પણ જાતની અગવડતા કે મુશ્કેલી ન પડે તે માટે જેલ સત્તાધીશો દ્વારા અગાઉથી જ તમામ તૈયારીઓ પૂર્ણ કરી લેવામાં આવી હતી. મુલાકાતીઓની ભારે ભીડને ધ્યાનમાં રાખીને જેલ પરિસર અને આસપાસના વિસ્તારમાં ચુસ્ત પોલીસ બંદોબસ્ત પણ ગોઠવવામાં આવ્યો હતો. આ આયોજન અંગે માહિતી આપતા ઈન્ચાર્જ જેલ અધિક્ષક એન.સી.વાઘેલાએ જણાવ્યું હતું કે, જેલના વડા ડૉક્ટર કે.એલ. રાવ સાહેબની સૂચના અને ડી.આઈ.જી. રાકેશ બારોટ સાહેબના માર્ગદર્શન હેઠળ મહેસાણા જિલ્લા જેલ ખાતે આ કાર્યક્રમ યોજાયો છે. જેલમાં રહેલા તમામ બંધીવાન ભાઈઓની બહેનો નિર્વિઘ્ને આવીને રાખડી બાંધી શકે તે માટે જેલ તંત્ર દ્વારા તમામ જરૂરી સુવિધાઓ સુનિશ્ચિત કરવામાં આવી હતી. ઉલ્લેખનીય છે કે, મહેસાણા જિલ્લા જેલ ખાતે છેલ્લા ઘણા વર્ષોથી કેદીઓ પોતાના પરિવાર અને તહેવારોની લાગણીથી વંચિત ન રહે તે હેતુથી રક્ષાબંધનની વિશેષ ઉજવણીની પરંપરા જાળવી રાખવામાં આવી છે.