Raksha Bandhan 2026: રક્ષાબંધનનો તહેવાર આજે સમગ્ર દેશમાં ધામધૂમથી ઉજવાઈ રહ્યો છે. રક્ષાબંધન ભાઈ-બહેનના પવિત્ર પ્રેમ, સ્નેહ અને એકબીજાની રક્ષા કરવાના સંકલ્પનો તહેવાર છે. દર વર્ષની જેમ આ વર્ષે પણ પીએમ મોદીએ શાળામાં ભણતી નાની બાળકીઓ પાસે રાખડી બંધાવી. પીએમ મોદીએ તેની તસવીરો સોશિયલ મીડિયા પ્લેટફોર્મ પર પોસ્ટ કરી. પીએમ મોદીએ એક્સ પર તસવીરો પોસ્ટ કરતાં લખ્યું કે, 7, લોક કલ્યાણ માર્ગ પર રક્ષાબંધનની ઉજવણીની કેટલીક યાદગાર તસવીરો.

બાળકીઓએ પીએમ મોદીને બાંધી રાખડી

પીએમ મોદીએ પીએમ આવાસ પર રક્ષાબંધનના અવસરે બાળકો સાથે મુલાકાત કરી અને નાની-નાની બાળકીઓએ પીએમ મોદીના કાંડા પર રક્ષાસૂત્ર બાંધીને તેમના આશીર્વાદ લીધા. વડાપ્રધાને બાળકો સાથે ખૂબ હસી-મજાક કરી, તેમની સાથે હાથ મિલાવ્યો અને હસતાં-હસતાં ‘હાઈ-ફાઈવ’ પણ કર્યું.

પીએમ મોદી અને બાળકો વચ્ચે થયો સંવાદ

બાળકોના ચહેરા પરની ચમક અને પીએમ મોદીનો સ્નેહ આ પળને ખૂબ જ યાદગાર બનાવી રહ્યો હતો. કાર્યક્રમ દરમિયાન બાળકો અને વડાપ્રધાન વચ્ચે એક ખૂબ જ રસપ્રદ અને પ્રેમાળ સંવાદ પણ થયો. વાતચીત દરમિયાન એક બાળકીએ નિર્દોષતાથી પૂછ્યું કે તેમના બાળપણનું સપનું શું હતું? આ અંગે વડાપ્રધાન મોદીએ તરત જ સ્મિત સાથે જવાબ આપ્યો-તમારા લોકો સાથે મુલાકાત કરવાનું.

દ્રૌપદી મુર્મુએ પણ બાળકો પાસે બંધાવી રાખડી

રાષ્ટ્રપતિ દ્રૌપદી મુર્મુએ શુક્રવારે રાષ્ટ્રપતિ ભવન સાંસ્કૃતિક કેન્દ્રમાં અલગ-અલગ શાળાઓ અને સંગઠનોના બાળકો સાથે રક્ષાબંધનની ઉજવણી કરી. તેમણે કહ્યું કે રક્ષાબંધનનું મહત્વ ભાઈ-બહેનના સંબંધથી ઘણું વધારે છે. રાષ્ટ્રપતિએ બાળકો સાથેના વિશેષ રક્ષાબંધન સમારોહની તસવીરો પણ શેર કરી.

વધુ સમાચાર વાંચવા ડાઉનલોડ કરો સંદેશ ન્યૂઝ એપ