ચોમાસાની સિઝનમાં વરસાદની રાહ જોતા ગુજરાતમાં હવે ગરમી અને ઉકળાટની અસર પણ યથાવત રહેવાની આગાહી છે. વરસાદ ખેંચાતા ખેડૂતોની ચિંતા વધી છે, તો બીજી તરફ વીજળીની માંગમાં પણ અચાનક મોટો ઉછાળો આવ્યો છે. એક તરફ વાદળછાયું વાતાવરણ છે, પરંતુ મેઘરાજા મન મૂકીને વરસતા ન હોવાથી રાજ્યમાં મુશ્કેલી વધી રહી છે.

અલનીનોની અસરથી ચોમાસું નબળું?

હવામાનની સ્થિતિ વચ્ચે અલનીનોની અસરને કારણે ચોમાસું અપેક્ષા પ્રમાણે સક્રિય ન રહેવાની સ્થિતિ જોવા મળી રહી છે. રાજ્યમાં આગામી દિવસોમાં વાદળછાયું વાતાવરણ રહેવાની સાથે સામાન્ય વરસાદની શક્યતા છે. જોકે, વરસાદનું પ્રમાણ ખેડૂતોની જરૂરિયાત પ્રમાણે નહીં રહે તો ખેતી પર તેની સીધી અસર પડી શકે છે.

33થી 34 ડિગ્રી સુધી તાપમાન

ચોમાસામાં પણ ગરમીનો અનુભવ થવાની સ્થિતિ યથાવત રહેવાની શક્યતા છે. રાજ્યમાં મહત્તમ તાપમાન 33 થી 34 ડિગ્રીની આસપાસ રહેવાની આગાહી છે. વાદળછાયા વાતાવરણ વચ્ચે ભેજનું પ્રમાણ વધતા લોકોને ગરમી અને ઉકળાટ વધુ અનુભવાઈ શકે છે.

ચાર દિવસમાં વીજ માંગમાં 3259 મેગાવોટનો ઉછાળો

વરસાદ ખેંચાતા વીજળીની માંગમાં પણ મોટો વધારો નોંધાયો છે. માત્ર 4 દિવસમાં વીજ માંગમાં 3259 મેગાવોટનો વધારો થયો છે. ગરમી યથાવત રહે અને વરસાદમાં વધુ વિલંબ થાય તો વીજળીની માંગ વધીને 29500 મેગાવોટ સુધી પહોંચી શકે છે.

ખેડૂતોની નજર હવે મેઘરાજા પર

વરસાદ ખેંચાતા ખેડૂતો માટે સૌથી મોટી ચિંતા સિંચાઈની બની છે. પાકને પાણીની જરૂરિયાત વધી રહી છે ત્યારે ખેડૂતો હવે વરસાદની આતુરતાથી રાહ જોઈ રહ્યા છે. જો વરસાદ વધુ ખેંચાશે તો સિંચાઈ માટે વીજળીની માંગ પણ વધશે.

વરસાદ નહીં તો વીજળીનું ભારણ

આખરે સવાલ એ છે કે ચોમાસું જો આમ જ નબળું રહેશે તો તેની અસર માત્ર ખેતી પૂરતી સીમિત રહેશે કે વીજળી વ્યવસ્થા પર પણ મોટો બોજ પડશે? વરસાદની રાહ જોતા ખેડૂતો અને વધતી વીજ માંગ વચ્ચે આગામી દિવસો ગુજરાત માટે મહત્વના બની શકે છે.  

આ પણ વાંચો  :    Sandesh Digital Explainer : તહેવારો પહેલાં ખાંડ બની કડવી..! 40% સુધીના ભાવવધારા પાછળ શું છે મહત્વના કારણ?