શ્રાવણી પૂર્ણિમા અને રક્ષાબંધનના પવિત્ર પર્વે અમદાવાદના SGVP ગુરુકુલ સ્થિત દર્શનમ સંસ્કૃત મહાવિદ્યાલય ખાતે ‘વૈદિક ઉપાકર્મ વિધિ’ અને નૂતન યજ્ઞોપવીત ધારણનો કાર્યક્રમ યોજાયો હતો. ગુરુવર્ય શાસ્ત્રી શ્રી માધવપ્રિયદાસજી સ્વામીની પ્રેરણાથી ઋષિકુમારોએ આ પુરાતન વૈદિક પરંપરાનું પાલન કર્યું હતું. યજુર્વેદી, ઋગ્વેદી અને અથર્વવેદી પરંપરા મુજબ યોજાયેલા આ અનુષ્ઠાનનો પ્રારંભ પવિત્ર દશવિધ સ્નાનથી થયો હતો. ઋષિકુમારોએ ગૌમૂત્ર, ગોમય, હરિદ્રા, ઔષધિઓ, ફળ, તલ, ધાન્ય, દર્ભ, મૃત્તિકા અને સુવર્ણ જેવા દસ પવિત્ર દ્રવ્યો વડે શરીર અને અંતઃકરણની શુદ્ધિ કરી હતી. સ્નાનવિધિ બાદ વેદમાતા ગાયત્રી તેમજ સપ્તર્ષિઓની વિશેષ આરાધના કરવામાં આવી હતી. નૂતન યજ્ઞોપવીતમાં નવ તંતુ દેવતાઓનું આહ્વાન કરી, સવા લાખ ગાયત્રી મંત્રોના સામૂહિક જપના પ્રભાવથી સિદ્ધ કરાયેલી નવીન યજ્ઞોપવીત ધારણ કરવામાં આવી હતી. આ વિધિ દ્વારા ઋષિકુમારોએ વર્ષ દરમિયાન અજાણતા થયેલા દોષોનો ત્યાગ કરી નવસર્જનનો સંકલ્પ લીધો હતો. તેમણે પુનઃ શાસ્ત્રાધ્યયન અને વેદ-સંવર્ધન માટે સમર્પિત થવાનો દ્રઢ નિર્ધાર વ્યક્ત કર્યો હતો, જેમ સર્પ જૂની કાંચળીનો ત્યાગ કરે છે. ગુરુવર્ય સ્વામીજીના આશીર્વાદ હેઠળ આચાર્યો અને ઋષિકુમારોની ઉત્સાહભેર ભાગીદારીથી સમગ્ર SGVP પરિસરમાં વેદઘોષ ગુંજી ઉઠ્યો હતો, જે પ્રાચીન ઋષિ-પરંપરાની જીવંતતાની પ્રતીતિ કરાવતો હતો.