સુરત શહેરના ટ્રાફિકને નવી દિશા આપવા અને માસ ટ્રાન્સપોર્ટ સિસ્ટમ સુધારવા માટે ચાલી રહેલા ‘સુરત મેટ્રો રેલ પ્રોજેક્ટ’ સંદર્ભે અત્યંત ઉત્સાહજનક સમાચાર સામે આવ્યા છે. ડ્રીમસિટીથી અલથાણ વચ્ચેના પ્રથમ તબક્કાના એલિવેટેડ રૂટ પર નવેમ્બર મહિનાથી મેટ્રો ટ્રેન સેવાઓ સામાન્ય જનતા માટે શરૂ કરી દેવામાં આવશે.
સુરતીઓ માટે દિવાળીના મોટા સમાચાર
તંત્ર દ્વારા હાથ ધરવામાં આવેલા તમામ પ્રાથમિક ટેકનિકલ ટેસ્ટિંગ અને ટ્રાયલ રન સફળ રહ્યા છે. ટ્રાયલ રનની સફળતા બાદ હવે આ રૂટ પર આવતા મેટ્રો સ્ટેશનોના આખરી ફિનિશિંગ, ટિકિટિંગ સિસ્ટમ અને પેસેન્જર સુવિધાઓનું કામ યુદ્ધના ધોરણે ચલાવવામાં આવી રહ્યું છે જેથી દિવાળીના તહેવારો દરમિયાન સુરતીઓને આ મહત્વાકાંક્ષી સુવિધા સમર્પિત કરી શકાય. સુરત મેટ્રોના રૂટમાં સૌથી પડકારજનક અને ગીચ વિસ્તાર ગણાતા અંડરગ્રાઉન્ડ (ભૂગર્ભ) વિભાગમાં પણ કામગીરી તીવ્ર ઝડપે ચાલી રહી છે. ચોકબજારથી સુરત રેલવે સ્ટેશન વચ્ચે ટનલ બોરિંગ મશીન (TBM) ની મદદથી ટનલ બનાવવાની કામગીરી પૂર્ણતાના આરે છે.
સુરતમાં નવેમ્બરથી જ દોડશે મેટ્રો ટ્રેન
ડ્રીમસિટીથી અલથાણ સુધીનો રૂટ પ્રથમ મુસાફરો માટે ખુલ્લો મુકાશે, જેનાથી ખજોદ, સરસાણા અને અલથાણના સ્થાનિકોને સીધો ફાયદો થશે.ચોકબજારથી સ્ટેશન વિસ્તારની ટનલનું કામ પૂરું થતાં જ સુરતના સૌથી વ્યસ્ત અને ગીચ વિસ્તારો સીધા મેટ્રો નેટવર્ક સાથે જોડાઈ જશે. મેટ્રો શરુ થવાથી શહેરમાં રસ્તા પરના વાહનોનું ભારણ ઘટશે અને મુસાફરો પ્રદૂષણમુક્ત તથા ઝડપી મુસાફરી કરી શકશે.