ડાંગ જિલ્લાના પ્રખ્યાત પ્રવાસન ધામ સાપુતારા નજીક આવેલા ઘાટ માર્ગ પર એક માર્ગ અકસ્માતની ઘટના સામે આવી છે. નાશિકથી સુરત તરફ આવી રહેલી મુસાફર બસ માલેગાંવ ઘાટ ઉતરી રહી હતી તે સમયે પાછળથી પૂરઝડપે આવતી એક ટ્રકે બસને જોરદાર ટક્કર મારી હતી. પ્રાથમિક માહિતી મુજબ, ઘાટ ઉતરતી વખતે ટ્રકની બ્રેક ફેલ થઈ જતાં ડ્રાઇવરે વાહન પરનો કાબૂ ગુમાવ્યો હતો અને ટ્રક ધડાકાભેર આગળ ચાલતી બસ પાછળ અથડાઈ હતી.

સદનસીબે મોટી જાનહાનિ ટળી, મુસાફરોને સામાન્ય ઈજા

આ અકસ્માત એટલો ઝડપી હતો કે બસમાં સવાર મુસાફરોમાં ક્ષણભર માટે ભારે ડર અને ફફડાટ વ્યાપી ગયો હતો. ધડાકાના અવાજ સાથે બસ અથડાતાં ઘાટ માર્ગ પર થોડા સમય માટે અફરાતફરીનો માહોલ સર્જાયો હતો. જોકે, સદનસીબે આ અકસ્માતમાં કોઈ પણ મુસાફરને ગંભીર ઈજા પહોંચી ન હતી અને મોટી જાનહાનિ ટળી હતી. બસમાં સવાર કેટલાક યાત્રીઓને સામાન્ય નાની-મોટી ઈજાઓ પહોંચી હતી.

પોલીસ કાફલો ઘટનાસ્થળે પહોંચ્યો, તપાસ હાથ ધરાઈ

ઘટના અંગેની જાણ થતાં જ સ્થાનીય પોલીસ કાફલો તુરંત સાપુતારા ઘાટ માર્ગ ખાતે દોડી આવ્યો હતો. પોલીસે ઘટનાસ્થળે પહોંચીને સૌથી પહેલાં વાહનવ્યવહાર પૂર્વવત કરાવ્યો હતો અને મુસાફરોની સ્થિતિ અંગે માહિતી મેળવી હતી. ટ્રકની બ્રેક ફેલ થવાના કારણે આ અકસ્માત સર્જાયો હોવાનું સામે આવ્યું છે, ત્યારે પોલીસે આ મામલે ગુનો નોંધીને વધુ કાયદેસરની તપાસ હાથ ધરી છે.

આ પણ વાંચો : Banaskantha News : વડા ગામમાંથી આધેડનો શંકાસ્પદ મૃતદેહ મળતાં ચકચાર, હત્યા થઈ હોવાની ચર્ચાએ જોર પકડ્યું