ગીર સોમનાથના વેરાવળમાં રહેણાંક મકાનમાં ચાલતી મહિલા સંચાલિત જુગાર ક્લબ પર જિલ્લા એલસીબીએ દરોડો પાડી મોટી કાર્યવાહી કરી છે. ગીતા વિદ્યાલય નજીક આવેલા શ્રીજી કૃપા નામના મકાનમાં ચાલતા જુગારના અડ્ડા પરથી 13 મહિલાઓને પોલીસે રંગેહાથ ઝડપી પાડી હોવાની માહિતી સામે આવી છે. ઘટનાની જાણ થતાં જ શહેરમાં આ કાર્યવાહી ચર્ચાનો વિષય બની છે.

મહિલા ચલાવતી હતી જુગાર ક્લબ

મળતી માહિતી મુજબ શ્રીજી કૃપા નામના રહેણાંક મકાનમાં કુંદનબેન મખેચા નામની મહિલા દ્વારા જુગારની ક્લબ ચલાવવામાં આવતી હોવાનો આરોપ છે. LCBની ટીમે રાત્રિના આશરે 11 વાગ્યાના સુમારે દરોડો પાડ્યો હતો. દરોડા દરમિયાન મકાનમાં મહિલાઓ જુગાર રમતી હોવાની વિગતો સામે આવી હતી.

13 મહિલાઓ સામે કાર્યવાહી

LCBની કાર્યવાહીમાં કુલ 13 મહિલાઓ ઝડપાઈ હતી. પોલીસે તમામ વિરુદ્ધ જુગારધારા હેઠળ ગુનો નોંધી કાયદેસરની કાર્યવાહી હાથ ધરી છે. રહેણાંક વિસ્તારમાં આ પ્રકારે જુગારનો અડ્ડો ચાલતો હોવાની વાત સામે આવતા સ્થાનિક સ્તરે પણ ચર્ચા તેજ બની છે.

દરોડા બાદ રાજકીય ફોનની ચર્ચા

દરોડા બાદ પોલીસ તંત્રમાં રાજકીય નેતાઓના ફોનની ઘંટડીઓ રણકી હોવાની ચર્ચા પણ વેગ પકડી છે. સમગ્ર મામલે હવે તપાસ દરમિયાન જુગાર ક્લબ પાછળ કોનું પીઠબળ હતું અને આ પ્રવૃત્તિ કેટલા સમયથી ચાલતી હતી તેવા સવાલો પણ મહત્વના બન્યા છે.

વેરાવળમાં ‘જુગાર ક્લબ’ ટોક ઓફ ધ ટાઉન

વેરાવળમાં રહેણાંક મકાનમાંથી મહિલા સંચાલિત જુગાર ક્લબ ઝડપાતા સમગ્ર શહેરમાં આ કાર્યવાહી ચર્ચાનો વિષય બની છે. હવે પોલીસ તપાસમાં જુગારના અડ્ડા સાથે સંકળાયેલા અન્ય લોકોની ભૂમિકા, વ્યવસ્થાપન અને આ પ્રવૃત્તિની પાછળનું નેટવર્ક બહાર આવે છે કે કેમ તેના પર નજર રહેશે. 

આ પણ વાંચો  :  Nepal Flood : ભયાનક પૂર વચ્ચે એકલું ઘર અડીખમ, પાણીમાં આખું ગામ તણાયું છતાં મકાન બચી ગયું જુઓ ભયાનક Video