મણિપુરના કાકચિંગ જિલ્લામાં રવિવારની રાત્રે નેશનલ સિટિઝન રજિસ્ટર એટલે કે NRC અપડેટ કરવાની માગને લઈને નીકળેલી મશાલ રેલી હિંસક બની ગઈ. પ્રદર્શનકારીઓના એક જૂથે પોલીસ પર પથ્થરમારો કર્યો, જેના જવાબમાં સુરક્ષાદળોએ ભીડને વિખેરવા માટે અનેક ટિયર ગેસના ગોળા છોડ્યા. આ ઘટનામાં કેટલાક પ્રદર્શનકારીઓને સામાન્ય ઈજાઓ થઈ હતી.

કઈ માગને લઈને મશાલ રેલી કાઢવામાં આવી હતી?

વાબાગાઈ, હિયાંગલામ અને આસપાસના વિસ્તારોના સેંકડો ગ્રામજનોએ રવિવારની રાત્રે લગભગ 3 કિલોમીટર લાંબી રેલી કાઢી હતી. પ્રદર્શનકારીઓ ‘નો NRC, નો સેન્સસ’ના નારા લગાવી રહ્યા હતા. તેમની માગ હતી કે રાજ્યમાં વસ્તી ગણતરીની પ્રક્રિયા શરૂ કરતા પહેલાં NRC અપડેટ કરવામાં આવે. આ ઉપરાંત આંતરિક રીતે વિસ્થાપિત લોકોના પુનર્વસન પહેલાં વસ્તી ગણતરી કરાવવાનો પણ તેમણે વિરોધ કર્યો હતો.

પોલીસ સાથે પ્રદર્શનકારીઓની અથડામણ કેવી રીતે થઈ?

અધિકારીઓના જણાવ્યા અનુસાર, પ્રદર્શનકારીઓ કાકચિંગ જિલ્લા મુખ્યાલય તરફ આગળ વધી રહ્યા હતા ત્યારે પોલીસે કીરાક બંધ વિસ્તાર પાસે તેમને રોક્યા હતા. પોલીસે પ્રદર્શનકારીઓને પાછા ફરવા કહ્યું હતું. ત્યાર બાદ સ્થિતિ તણાવપૂર્ણ બની ગઈ અને કેટલાક પ્રદર્શનકારીઓએ પોલીસ પર પથ્થરમારો શરૂ કર્યો. સ્થિતિ વધુ ખરાબ થતાં પોલીસે ભીડને કાબૂમાં લેવા માટે અનેક ટિયર ગેસના ગોળા છોડ્યા. અધિકારીઓએ જણાવ્યું કે આ દરમિયાન કેટલાક પ્રદર્શનકારીઓને સામાન્ય ઈજાઓ થઈ હતી.

મણિપુરમાં હિંસાનો જૂનો સંદર્ભ શું છે?

મણિપુરમાં મે 2023થી મૈતેઈ અને કુકી સમુદાયો વચ્ચે જાતીય હિંસા ચાલી રહી છે. આ હિંસામાં અત્યાર સુધી 260થી વધુ લોકોનાં મોત થયા છે, જ્યારે હજારો લોકો વિસ્થાપિત થયા છે. તાજેતરના વિરોધ પ્રદર્શનમાં NRC અને વસ્તી ગણતરી સાથે જોડાયેલા મુદ્દાઓ ઉપરાંત વિસ્થાપિત લોકોના પુનર્વસનની માગ પણ મુખ્ય રહી હતી. વહીવટીતંત્ર દ્વારા સ્થિતિ પર નજર રાખવામાં આવી રહી છે.

આ પણ વાંચો-Miracle House : કુદરતના ભયાનક કહેર વચ્ચે અડીખમ ઊભું રહ્યું આ ચમત્કારી મકાન! VIDEO VIRAL