રાજકોટમાં પ્રયાસ ફાઉન્ડેશન દ્વારા શહેરની સરકારી સરોજિની નાયડુ ગર્લ્સ હાઇસ્કુલ ખાતે મનોદિવ્યાંગ બાળકો માટે કૃષ્ણ જન્મોત્સવનું આયોજન કરવામાં આવ્યું હતું. આ પ્રસંગે સંસ્થાના 220 માંથી 50 મનોદિવ્યાંગ બાળકો અવનવા કોશ્ચ્યૂમ પહેરી આવ્યા હતા. જેમાં મનોદિવ્યાંગ દીકરીઓએ “વાગ્યો રે ઢોલ” તો દીકરાઓએ કેડિયું પહેરી ગરબાની રમઝટ બોલાવી હતી અને ત્યારબાદ મટકી ફોડ કાર્યક્રમમાં ઉત્સાહભેર કૃષ્ણ જન્મોત્સવની ઉજવણી કરવામાં આવી હતી. રાજકોટમાં મનોદિવ્યાંગો માટે કાર્યરત પ્રયાસ ફાઉન્ડેશનના સ્થાપક પૂજાબેન પટેલે જણાવ્યું હતું કે, અમારી સંસ્થા સેરેબલ પાલ્સી, ઓટિઝમ, ડાઉન સિન્ડ્રોમ અને ઇન્ટેલેક્યુલ ડિસેબલ જેને આપણે પહેલા મંદ બુદ્ધિના બાળકો કહેતા હતા અને અત્યારે અમે તેમને મનો દિવ્યાંગ બાળકો કહીએ છીએ. દર વખતે અમે અલગ અલગ તહેવારોની આ બાળકો સાથે ઉજવણી કરીએ છીએ ત્યારે આ વખતે કૃષ્ણ જન્મોત્સવનું આયોજન કરવામાં આવ્યું છે. આજે અમારી મમ્મીઓ કાન ગોપી બનીને આવી છે. બાળકો સાથે માતા રાધા બની છે. દીકરી હોય તો તેની મમ્મી યશોદા બની છે. આજે સમગ્ર ગુજરાત જ નહીં પરંતુ ભારતમાં પ્રથમ વખત એવું થઈ રહ્યું હશે કે દિવ્યાંગ બાળકો સાથે તેમની માતા રાસ રમી કૃષ્ણ જન્મોત્સવની ઉજવણી કરી રહી છે. અમે તેમના માટે પ્રથમ, દ્વિતીય અને તૃતીય ઇનામો પણ રાખેલા છે. જેથી આ બાળકોનો કોશ્ચ્યૂમનો ખર્ચ પણ નીકળી શકે. દીકરીઓને ગરબો અને છોકરાઓએ રાસ તૈયાર કર્યો છે. અમારી સંસ્થામાં 220 જેટલા દિવ્યાંગ બાળકો છે.