કચ્છના ભુજ શહેરની સેશન્સ કોર્ટના પરિસરમાં છરી વડે હુમલાની ઘટના બની છે. જૂની અદાવતને કારણે એક યુવક પર હુમલો કરવામાં આવ્યો હતો. હુમલાખોરે યુવકના પેટના ભાગે છરીનો ઘા મારતા તે ગંભીર રીતે ઘાયલ થયો હતો. મળતી માહિતી મુજબ, આજે ભુજ સેશન્સ કોર્ટ પરિસરમાં યુવક અને હુમલાખોર વચ્ચે જૂની અદાવતને લઈને બોલાચાલી થઈ હતી. મામલો ગંભીર બનતા હુમલાખોરે અચાનક છરી કાઢી યુવક પર હુમલો કર્યો. યુવકના પેટમાં છરી વાગતા તે લોહીલુહાણ હાલતમાં જમીન પર ઢળી પડ્યો હતો. આ ઘટનાથી કોર્ટ પરિસરમાં હાજર લોકોમાં નાસભાગ મચી ગઈ હતી. આ હુમલો DySP અને PI સહિતના પોલીસ અધિકારીઓ તથા કર્મચારીઓની હાજરીમાં થયો હતો. પોલીસની નજર સામે બનેલી આ ઘટનાથી સુરક્ષા વ્યવસ્થા પર સવાલો ઊભા થયા છે. જોકે, ઘટનાની જાણ થતાં જ હાજર પોલીસ અધિકારીઓએ સમયસૂચકતા વાપરી ઘાયલ યુવકને તરત સારવાર માટે હોસ્પિટલ પહોંચાડ્યો હતો. બીજી તરફ, પોલીસે હુમલાખોર સામે કાયદેસરની કાર્યવાહી શરૂ કરી છે. હુમલા પાછળનું ચોક્કસ કારણ, બંને પક્ષો વચ્ચે અગાઉનો કોઈ વિવાદ અને હુમલામાં અન્ય કોઈની સંડોવણી છે કે કેમ તે સહિતના મુદ્દાઓ પર તપાસ ચાલી રહી છે. કોર્ટ પરિસર જેવા સુરક્ષિત સ્થળે પોલીસ અધિકારીઓની હાજરી વચ્ચે થયેલા આ હુમલાની ઘટનાએ ભુજમાં ચર્ચા જગાવી છે. સમગ્ર મામલે પોલીસની તપાસ પછી વધુ વિગતો બહાર આવે તેવી શક્યતા છે.