વડોદરા શહેરના વાસણા જકાતનાકા વિસ્તારમાં આવેલી એક બંધ બાંધકામ સાઇટ પરથી લિફ્ટના ઊંડા ખાડામાંથી અજાણ્યા યુવકનો મૃતદેહ મળી આવતાં સમગ્ર પંથકમાં ભારે ચકચાર મચી ગઈ છે. સાઇટ પર કામ કરતાં અને ત્યાં જ આશરો લેતાં શ્રમજીવીઓની નજર લિફ્ટના ડક્ટમાં પડતાં આ કરુણ ઘટના પ્રકાશમાં આવી હતી. બનાવની જાણ થતાં જ ગોત્રી પોલીસ કાફલો ઘટનાસ્થળે દોડી આવ્યો હતો અને સ્થાનિકોની મદદથી મૃતદેહને બહાર કાઢી પંચનામું કરી પોસ્ટમોર્ટમ અર્થે મોકલી આપ્યો હતો. મૃતક પાસેથી કોઈ પણ પ્રકારનો ઓળખ પુરાવો ન મળવાને કારણે પોલીસે અજાણ્યા યુવકના વાલીવારસોની સઘન શોધખોળ હાથ ધરી છે. શ્રમજીવીઓએ લિફ્ટના ખાડામાં લાશ જોતાં કોન્ટ્રાક્ટરને વાકેફ કર્યા
બનાવની પ્રાપ્ત વિગતો અનુસાર, વાસણા જકાતનાકા નજીક આવેલી ‘રિદ્ધિ’ નામની બાંધકામ સાઇટ હાલ કોઈ કારણોસર બંધ હાલતમાં છે. જોકે આ સાઇટ પરિસરમાં કેટલાક શ્રમજીવી પરિવારો રહે છે. રોજિંદા ક્રમ મુજબ શ્રમજીવીઓ સાઇટના ઉપરના ભાગેથી નીચે ઉતરી રહ્યા હતા ત્યારે અચાનક તેમની નજર લિફ્ટ માટે ખોદવામાં આવેલા ઊંડા ખાડા તરફ પડી હતી. ખાડાની અંદર એક યુવક નિશ્ચેષ્ટ હાલતમાં પડેલો દેખાતાં શ્રમજીવીઓ ચોંકી ઉઠ્યા હતા અને તેમણે તાત્કાલિક સાઇટના કોન્ટ્રાક્ટરને બોલાવી સમગ્ર હકીકત જણાવી હતી. તબીબોએ મૃત જાહેર કર્યો, મૃતદેહ કોલ્ડરૂમમાં રખાયો
સાઇટ કોન્ટ્રાક્ટરે આ ગંભીર બાબતની જાણ ગોત્રી પોલીસ સ્ટેશનને કરતાં પોલીસ ટીમ તાબડતોબ ઘટનાસ્થળે પહોંચી હતી. પોલીસે ખાડામાંથી યુવકના શરીરને સાવચેતીપૂર્વક બહાર કાઢી તાત્કાલિક ગોત્રી જનરલ હોસ્પિટલ ખાતે ખસેડ્યો હતો. જોકે હોસ્પિટલના ફરજ પરના તબીબોએ પ્રાથમિક તપાસ બાદ યુવકને મૃત જાહેર કર્યો હતો. યુવક લિફ્ટના ખાડામાં અકસ્માતે પટકાયો હતો કે પછી બનાવ પાછળ અન્ય કોઈ કારણ જવાબદાર છે તે દિશામાં પણ તપાસ કેન્દ્રિત કરવામાં આવી છે. કોઈ દસ્તાવેજ ન મળતાં પરિવારજનોની શોધખોળ શરૂ
મૃતક યુવકના કપડાં અને ખિસ્સાની ઝડતી લેતાં તેની પાસેથી કોઈ ઓળખપત્ર, મોબાઈલ ફોન કે અન્ય કોઈ સત્તાવાર દસ્તાવેજ મળી આવ્યા નહોતા. જેથી યુવકની ઓળખ છતી થઈ શકી નથી. હાલ પોલીસે મૃતદેહને ગોત્રી હોસ્પિટલના કોલ્ડરૂમમાં સુરક્ષિત રખાવ્યો છે. ગોત્રી પોલીસે અકસ્માતે મોતનો ગુનો નોંધી આસપાસના પોલીસ મથકોમાં નોંધાયેલી ગુમશુદા વ્યક્તિઓની યાદી સાથે ચકાસણી શરૂ કરી છે તેમજ યુવકના વાલીવારસો મળી રહે તે માટે તજવીજ હાથ ધરી છે.