ભારત વૈશ્વિક વેપારમાં પોતાની સ્થિતિ વધુ મજબૂત બનાવવા માટે વિવિધ દેશો અને જૂથો સાથે ફ્રી ટ્રેડ એગ્રીમેન્ટ્સ (FTAs) પર ઝડપથી આગળ વધી રહ્યું છે. કેન્દ્રીય વાણિજ્ય અને ઉદ્યોગ મંત્રી પીયૂષ ગોયલે જણાવ્યું કે આગામી સમયમાં ભારતને વિશ્વના કુલ વેપારના લગભગ 75 ટકા હિસ્સા સુધી પ્રેફરન્શિયલ માર્કેટ એક્સેસ મળી શકે છે.
ભારતને વૈશ્વિક વેપારના લગભગ બે તૃતિયાંશ હિસ્સા સુધી પ્રેફરન્શિયલ એક્સેસ મળશે
પીયૂષ ગોયલના જણાવ્યા મુજબ ભારત દ્વારા અત્યાર સુધી કરવામાં આવેલા 9 FTAs લગભગ 60 ટ્રિલિયન ડોલરની સંયુક્ત GDP ધરાવતા બજારોને આવરી લે છે. આ કરારોના કારણે ભારતને વૈશ્વિક વેપારના લગભગ બે તૃતિયાંશ હિસ્સા સુધી પ્રેફરન્શિયલ એક્સેસ મળશે. તેમણે જણાવ્યું કે આગામી કેટલાક મહિનાઓ અને વર્ષોમાં કેનેડા, મેક્સિકો, ચિલી, મર્કોસુર, SACU દેશો, GCC અને ઈઝરાયલ સાથેના પ્રસ્તાવિત વેપાર કરારો દ્વારા આ માર્કેટ એક્સેસ વધુ વિસ્તરશે. આ ઉપરાંત ASEAN, દક્ષિણ કોરિયા અને જાપાન સાથેના હાલના કરારોની સમીક્ષા અથવા અન્ય જરૂરી પગલાં દ્વારા પણ ભારતની વેપાર સ્થિતિ સુધારવાનો પ્રયાસ કરવામાં આવી રહ્યો છે.
ભારતીય ઉત્પાદનો માટે પણ ટેરિફ દરો સ્પર્ધકોની સરખામણીમાં વધુ સારા બનશે
ગોયલે સમજાવ્યું કે PTA, FTA અથવા દ્વિપક્ષીય વેપાર કરારનો મુખ્ય હેતુ સ્પર્ધાત્મક દેશોની સરખામણીમાં વધુ સારો ટેરિફ રેટ મેળવવાનો હોય છે. તેમના જણાવ્યા પ્રમાણે ભૂતકાળમાં ઘણા વિકાસશીલ દેશોએ વિકસિત દેશો સાથે એવા કરારો કર્યા હતા, જેમાં તેમના નિકાસ ઉત્પાદનો પર ઓછો અથવા શૂન્ય ડ્યૂટી દર હતો, જ્યારે ભારતીય નિકાસકારોને ઊંચી ડ્યૂટીનો સામનો કરવો પડતો હતો.
હવે સ્થિતિ બદલાઈ રહી હોવાનું જણાવતાં ગોયલે કહ્યું કે ભારતીય ઉત્પાદનો માટે પણ ટેરિફ દરો સ્પર્ધકોની સરખામણીમાં વધુ સારા બનશે. વિકસિત બજારોમાં ભારત પાસે હવે નબળા પ્રદર્શનનું બહાનું પણ નહીં રહે અને સફળતા માટે મુખ્ય જવાબદારી ભારતની પોતાની રહેશે. ગોયલે સ્પષ્ટ શબ્દોમાં કહ્યું કે ‘હવે બોલ સંપૂર્ણપણે આપણા કોર્ટમાં છે’, એટલે કે વેપાર કરારો બાદ ભારતીય ઉદ્યોગે પોતાની સ્પર્ધાત્મકતા, ગુણવત્તા અને નિકાસ ક્ષમતાના આધારે વૈશ્વિક બજારમાં સફળતા મેળવવી પડશે.