વડોદરા શહેર પીસીબી પોલીસે બાતમીના આધારે કપુરાઈ પોલીસ સ્ટેશન વિસ્તારમાંથી ‘મા શક્તિ ટ્રાવેલ્સ’ની બસમાંથી ₹9.24 લાખનો વિદેશી દારૂ ઝડપી પાડ્યો છે. મધ્યપ્રદેશના ઇન્દોરથી લાવવામાં આવી રહેલા આ જથ્થા સાથે પોલીસે બસના ક્લીનરની ધરપકડ કરી છે. આ કાર્યવાહીમાં બસ અને દારૂ સહિત કુલ ₹24.29 લાખનો મુદ્દામાલ જપ્ત કરવામાં આવ્યો છે, જ્યારે બસ ડ્રાઈવર સહિત 3 શખસને વોન્ટેડ જાહેર કરાયા છે. બનાવટી ખાનાઓમાંથી દારૂની 2,857 બોટલ મળી આવી
પોલીસને મળેલી ચોક્કસ બાતમીના આધારે ઇન્દોરથી વડોદરા આવી રહેલી ‘મા શક્તિ ટ્રાવેલ્સ’ની બસને આંતરીને તપાસ હાથ ધરાઈ હતી. જેમાં બસમાંથી વિદેશી દારૂની કુલ 2,857 બોટલ અને ટીન (કિંમત ₹9,24,688) મળી આવ્યા હતા. પોલીસે દારૂના જથ્થા સાથે ₹15 લાખની કિંમતની ટ્રાવેલ્સ બસ અને મોબાઈલ ફોન મળી કુલ ₹24,29,688નો મુદ્દામાલ કબજે કર્યો છે. મહારાષ્ટ્રના ક્લીનરની અટકાયત, ડ્રાઈવર સહિત 3 સામે ગુનો
દરોડા દરમિયાન પોલીસે બસના ક્લીનર રફીક સલીમભાઈ શેખ (રહે. શિરપુર, ધુલિયા, મહારાષ્ટ્ર)ને ઝડપી પાડ્યો હતો. પ્રાથમિક પૂછપરછ બાદ પોલીસે દારૂ મોકલનાર, મેળવનાર અને ડ્રાઈવર સામે ગુનો નોંધી 3 શખસ ઇસ્માઇલભાઈ મલેક (રહે. સુરત, બસ ડ્રાઇવર), જીતેન્દ્ર પાલ (રહે. ઇન્દોર – દારૂનો જથ્થો મોકલનાર) અને વિપુલ પંચાલ (રહે. ઘાંઘરેટીયા, વડોદરા – દારૂ મંગાવનાર)ને વોન્ટેડ જાહેર કર્યા છે. તપાસના ચક્રો ગતિમાન
મધ્યપ્રદેશથી ગુજરાતમાં દારૂ સપ્લાય કરવાના આ પાછળના મુખ્ય માસ્ટરમાઈન્ડ સુધી પહોંચવા પોલીસે ટેકનિકલ સર્વેલન્સ અને વોન્ટેડ આરોપીઓને ઝડપી પાડવા ચક્રો ગતિમાન કર્યા છે.