ભારતીય ક્રિકેટ ટીમના મુખ્ય પસંદગીકાર અજીત અગરકર ફરી એકવાર ચર્ચામાં આવ્યા છે.ગુરુવારે ભારતીય ક્રિકેટ કંટ્રોલ બોર્ડની મહત્વની બેઠક મળી હતી.આ બેઠકમાં બોર્ડના કેટલાક મોટા અધિકારીઓ અને ટીમ સાથે જોડાયેલા મહત્વના લોકો હાજર રહ્યા હતા.જોકે,અજીત અગરકરની ગેરહાજરીએ ક્રિકેટ જગતમાં નવી ચર્ચાને જન્મ આપ્યો છે.બીસીસીઆઈના સચિવ દેવજીત સૈકિયાએ સ્પષ્ટતા કરી હતી કે અગરકર શહેરની બહાર હોવાથી બેઠકમાં હાજર રહી શક્યા નહોતા.તેમણે એવું પણ જણાવ્યું કે અગરકર એવી જગ્યાએ હતા જ્યાં ઇન્ટરનેટની સુવિધા પણ ઉપલબ્ધ નહોતી.તેમ છતાં સોશિયલ મીડિયા અને ક્રિકેટ વર્તુળોમાં અગરકરના ભવિષ્યને લઈને ચર્ચા શરૂ થઈ ગઈ છે.

બીસીસીઆઈની બેઠકમાં અગરકર ગેરહાજર

બીસીસીઆઈની બેઠક મુંબઈ સ્થિત મુખ્ય કાર્યાલયમાં યોજાઈ હતી.ટીમ ઈન્ડિયાના મુખ્ય કોચ,સીઓઈના વડા વીવીએસ લક્ષ્મણ, ટી20 ટીમના કેપ્ટન શ્રેયસ ઐયર તેમજ ટેસ્ટ અને વનડે ટીમના કેપ્ટન શુભમન ગિલ સહિતના લોકો બેઠકમાં હાજર રહ્યા હતા.અગરકરની ગેરહાજરીને લઈને સૈકિયાએ કહ્યું કે આ બેઠક ખૂબ જ ઓછા સમયમાં બોલાવવામાં આવી હતી.તેથી અગરકર તેમાં હાજર રહી શક્યા નહોતા.તેમણે એ પણ સ્પષ્ટ કર્યું કે આ પસંદગી બેઠક નહોતી અને તેમાં ખેલાડીઓની પસંદગી અંગે કોઈ ચર્ચા થઈ નહોતી.પરંતુ થોડા દિવસ પહેલાં જ અફઘાનિસ્તાન સામેની 3 ટી20 મેચની શ્રેણી માટે ભારતીય ટીમની જાહેરાત કરવામાં આવી હતી. તે સમયે પસંદગીકારોએ ઓનલાઈન ચર્ચા કરી હતી. આ કારણે અગરકર એવી કઈ જગ્યાએ ગયા હતા જ્યાં ઇન્ટરનેટ ઉપલબ્ધ નહોતું, તેને લઈને સવાલો ઊભા થયા છે.

રોહિત શર્માને લઈને પણ ચર્ચા

અજીત અગરકરનું નામ અગાઉ પણ રોહિત શર્માના નિવૃત્તિના મુદ્દે ચર્ચામાં આવ્યું હતું. ઇંગ્લેન્ડ સામેની શ્રેણી દરમિયાન એવી ચર્ચા હતી કે અગરકરે રોહિતને નિવૃત્તિ અંગે વિચારવા કહ્યું હતું.જોકે આ વાતની સત્તાવાર પુષ્ટિ થઈ નથી.રોહિતે ત્યારબાદ મેદાન પર શાનદાર પ્રદર્શન કર્યું અને મહત્વની મેચમાં સદી ફટકારી હતી. આ પછી તેમના ભવિષ્યને લઈને ફરી ચર્ચા તેજ બની હતી.બેઠક બાદ દેવજીત સૈકિયાને રોહિત શર્મા અંગે સવાલ પૂછવામાં આવ્યો ત્યારે તેમણે કહ્યું હતું કે રોહિત સતત સારું રમી રહ્યા છે અને તાજેતરની મેચમાં પણ તેમણે સદી ફટકારી છે. તેથી તેમના નિવૃત્તિ અંગેની ચર્ચા ક્યાંથી આવી તે અંગે તેમણે સવાલ ઉઠાવ્યો હતો.

અગરકર અને રોહિત વચ્ચે બધું ઠીક છે?

અગરકર મુખ્ય પસંદગીકાર બન્યા બાદ ભારતીય ટીમમાં અનેક મોટા ફેરફાર જોવા મળ્યા છે.ચેમ્પિયન્સ ટ્રોફી જીત્યા બાદ રોહિત શર્માને વનડે ટીમની કેપ્ટનશિપમાંથી હટાવીને શુભમન ગિલને જવાબદારી સોંપવામાં આવી હતી.આ નિર્ણય બાદ અગરકર અને રોહિત વચ્ચેના સંબંધોને લઈને પણ ચર્ચા થતી રહી છે. જોકે બંને વચ્ચે ખરેખર કોઈ મતભેદ છે કે નહીં તેની કોઈ સત્તાવાર માહિતી સામે આવી નથી.

આગામી વર્ષે પૂરો થશે અગરકરનો કાર્યકાળ

અજીત અગરકરનો મુખ્ય પસંદગીકાર તરીકેનો કાર્યકાળ આગામી વર્ષે જુલાઈ સુધી છે.ત્યારબાદ ઓક્ટોબર-નવેમ્બરમાં વનડે વિશ્વ કપ યોજાવાનો છે. આવી સ્થિતિમાં અગરકરનો કાર્યકાળ આગળ વધારવામાં આવે છે કે નહીં તેના પર પણ સૌની નજર રહેશે.હાલમાં અગરકરની ગેરહાજરીને લઈને અનેક અટકળો ચાલી રહી છે. જોકે બીસીસીઆઈએ તેમની ગેરહાજરીનું કારણ સ્પષ્ટ કરી દીધું છે.હવે અગરકર અને રોહિત શર્માને લઈને ચાલી રહેલી ચર્ચાઓમાં કેટલી સચ્ચાઈ છે તે આગામી સમયમાં જ સ્પષ્ટ થશે.

આ પણ વાંચો – Asia Cup T20 માં ભારતની 137 રનથી ભવ્ય જીતથી ખુશ થઈ કેપ્ટન હરમન પ્રીત, સ્મૃતિ અને શેફાલી માટે શું કહ્યું