નવસારીના બીએપીએસ સ્વામિનારાયણ મંદિરમાં શરદ પૂર્ણિમાના દિવસે અક્ષરબ્રહ્મ ગુણાતીતાનંદ સ્વામીનો ૨૪૧મો જન્મોત્સવ ઉજવાયો. આ ઉત્સવની શરૂઆત ધૂન, પ્રાર્થના અને કીર્તનથી થઈ. ભગવાન સ્વામિનારાયણના પ્રથમ અનુગામી ગુણાતીતાનંદ સ્વામીનો જન્મ શરદ પૂર્ણિમાએ રાત્રે ૧૨ વાગ્યે સૌરાષ્ટ્રના ભાદરા ગામે મૂળજી શર્મા તરીકે થયો હતો. તેમણે ભગવાન સ્વામિનારાયણના હસ્તે દીક્ષા લીધી હતી. ઉત્સવ દરમિયાન કમલનયન સ્વામીએ ‘ગુણાતીત તો એક’ વિષય પર પ્રવચન આપ્યું. કૃષ્ણપ્રિય દાસ સ્વામીએ પણ ગુણાતીતાનંદ સ્વામીના મહિમા વિશે વાત કરી. તેમના જીવન પર આધારિત ક્વિઝ પણ યોજાઈ, જેમાં યુવકોએ ભાગ લીધો. બાળકો, યુવાનો, વડીલો અને સંતોએ અક્ષરપુરુષોત્તમ મહારાજની પાંચ આરતી કરી. ત્યારબાદ મંદિરમાં ઠાકોરજીની મહાઆરતી કરવામાં આવી. દૂધપૌવાનો પ્રસાદ લઈને સૌ ભક્તો વિદાય થયા.