અમરેલી જિલ્લાના ધારી તાલુકાના ચલાલામાં વનકર્મી પર હુમલો થયો છે. સિંહ દર્શન કરાવવા બાબતે થયેલા વિવાદમાં આ ઘટના બની હતી. ચલાલા પોલીસે આ કેસમાં ત્રણ આરોપીઓની ધરપકડ કરી છે. આ ઘટના ચલાલા-ગોપાલગ્રામ રોડ પર બની હતી. વન વિભાગની ટીમ સિંહને સુરક્ષિત રીતે તેના કુદરતી રહેઠાણમાં છોડવાની કામગીરી કરી રહી હતી. તે સમયે ફોરચ્યુનર કારમાં આવેલા ત્રણ લોકોએ સિંહ દર્શન કરાવવાની માંગ કરી. વન વિભાગના ફોરેસ્ટર શિવરાજભાઈ ધાધલે કાયદેસરની ફરજને ધ્યાનમાં રાખીને સિંહ દર્શનની મંજૂરી આપી ન હતી. આનાથી મામલો ગરમાયો અને આરોપીઓએ ફોરેસ્ટર પર હુમલો કર્યો. આરોપીઓએ ફોરેસ્ટર સાથે ગાળાગાળી કરી, તેમની ફરજમાં અડચણ ઊભી કરી અને હાથના ભાગે હુમલો કર્યો. તેમને જાનથી મારી નાખવાની ધમકી પણ આપી હતી. વન વિભાગના વરિષ્ઠ અધિકારીઓની સૂચના બાદ ચલાલા પોલીસ સ્ટેશનમાં ફરિયાદ નોંધાઈ હતી.