અમેરિકાએ પશ્ચિમ એશિયામાં પોતાની સૈન્ય હાજરી વધારી દીધી છે. છેલ્લા એક અઠવાડિયામાં તેના 10થી વધુ સૈન્ય માલવાહક વિમાનો દક્ષિણ ઇઝરાઇલના એરબેઝ પર ઉતર્યાં છે. આ દરમિયાન રાષ્ટ્રપતિ ટ્રમ્પે ગુરુવારે વ્હાઇટ હાઉસમાં અમેરિકન સેનાના પશ્ચિમ એશિયા કમાન્ડર એડમિરલ બ્રેડ કૂપર સાથે મુલાકાત કરી. વોલ સ્ટ્રીટ જર્નલના અહેવાલ મુજબ, કૂપરે ઈરાન પર સંભવિત સૈન્ય હુમલાના વિકલ્પોની માહિતી આપી. બેઠકમાં અમેરિકાના સંરક્ષણ મંત્રી પીટ હેગસેથ અને જૉઇન્ટ ચીફ્સ ઑફ સ્ટાફના અધ્યક્ષ ડેન કેન પણ હાજર હતા. અમેરિકન ચૂંટણી બાદ ઈરાન પર હુમલાની તૈયારી અમેરિકા અને ઇઝરાઇલ 3 નવેમ્બરે યોજાનારી અમેરિકાની મિડટર્મ ચૂંટણી બાદ ઈરાન પર ફરી હુમલો કરવાની યોજના બનાવી રહ્યાં છે. વોલ સ્ટ્રીટ જર્નલના અહેવાલ મુજબ, બંને દેશો ટૂંકી પરંતુ ઝડપી સૈન્ય કાર્યવાહી પર વિચાર કરી રહ્યાં છે. તેમાં ઈરાનના ઊર્જા મથકો, પરમાણુ કેન્દ્રો તથા મિસાઇલો અને ડ્રોનના ભંડારોને નિશાન બનાવવામાં આવી શકે છે. જોકે, ટ્રમ્પ હજુ સૈન્ય કાર્યવાહી ન કરવાનો નિર્ણય પણ લઈ શકે છે. સાઉદી, કતાર, કુવૈતમાં પણ સૈન્ય હાજરી વધારી રહ્યું છે અમેરિકા વિમાન ટ્રેકિંગ ડેટા પર નજર રાખતા નિષ્ણાતોના જણાવ્યા અનુસાર, અમેરિકાના મોટા ભાગના સૈન્ય માલવાહક વિમાનો ટેક્સાસના બિગ્સ આર્મી એરફિલ્ડથી રવાના થયા હતા. તેઓ ઇઝરાઇલના નેવાતિમ અને ઓવદા એરબેઝ પર પહોંચ્યા હતા. આ ઉપરાંત અમેરિકાના અનેક સૈન્ય વિમાનો સાઉદી અરેબિયા, કતાર, કુવૈત અને જોર્ડનમાં આવેલા અમેરિકન સૈન્ય મથકો પર પણ પહોંચ્યા છે. આ વિમાનોમાં કયો સામાન લાવવામાં આવ્યો હતો, તેની માહિતી સામે આવી નથી. અહેવાલ મુજબ, અમેરિકા સંભવિત યુદ્ધ પહેલાં પશ્ચિમ એશિયામાં પોતાની હવાઈ સુરક્ષા મજબૂત કરી રહ્યું છે. અમેરિકા ટેક્સાસથી પેટ્રિયટ મિસાઇલ સિસ્ટમની એક બેટરી પણ પશ્ચિમ એશિયા મોકલી રહ્યું છે. તેનો ઉપયોગ દુશ્મનના મિસાઇલ હુમલાઓને રોકવા માટે કરવામાં આવે છે. ઈરાન પર ચૂંટણીઓમાં દખલ કરવાનો આરોપ લાગ્યો બ્રિટિશ અખબાર ધ ટેલિગ્રાફ અનુસાર, ઈરાને ઇઝરાયલની ચૂંટણીને અસર કરવાનો પ્રયાસ કર્યો હતો. સાથે જ તે આવતા અઠવાડિયે યોજાનારી અમેરિકાની મિડટર્મ ચૂંટણીમાં પણ દખલ કરવાની તૈયારી કરી રહ્યું હતું. અખબારે ઈરાની અધિકારીઓને ટાંકીને જણાવ્યું કે આ માટે એજન્ટોની ભરતી અને અમેરિકાની ચૂંટણી વ્યવસ્થાને હેક કરનારા સાયબર જૂથો બનાવવાનો પ્રયાસ કરવામાં આવ્યો હતો. એક અધિકારીએ જણાવ્યું કે ઈરાન તેને અમેરિકા અને ઇઝરાયલ વિરુદ્ધના યુદ્ધનો એક ભાગ માને છે. તેનો હેતુ બંને દેશોના લોકો વચ્ચે મતભેદ વધારવાનો છે. જોકે, ઈરાન કોઈ ચોક્કસ ઉમેદવારનું સમર્થન કરતું નથી. આ અહેવાલ એવા સમયે આવ્યો છે, જ્યારે ઇઝરાયલમાં ચૂંટણીમાં વિદેશી દખલના આરોપોની તપાસ ચાલી રહી છે. ચૂંટણી પંચે ગુરુવારે સુરક્ષા એજન્સી શિન બેટને તેની તપાસ કરવાનો આદેશ આપ્યો હતો. અમેરિકા-ઈરાન વચ્ચે વાતચીતના પ્રયાસો પણ ચાલુ ઈરાને ગુરુવારે જણાવ્યું કે તેને અમેરિકાના ઉપરાષ્ટ્રપતિ જેડી વેન્સનો પત્ર મળ્યો છે, પરંતુ તેમણે હજી સુધી જવાબ આપ્યો નથી. વૉલ સ્ટ્રીટ જર્નલના જણાવ્યા અનુસાર, આ પત્રનો હેતુ બંને દેશો વચ્ચે શાંતિ મંત્રણા ફરી શરૂ કરવાનો હતો. ઈરાને અમેરિકાની સામે મૂકેલી પોતાની 7 શરતો પૂરી કરવાની માગણી ફરીથી જણાવી છે. બીજી તરફ, ટ્રમ્પે જણાવ્યું કે વેન્સે ઈરાન સાથે શાંતિ મંત્રણા માટે નહીં, પરંતુ મેડિકલ સામગ્રી પહોંચાડવાના મામલે સંપર્ક કર્યો હતો. ટ્રમ્પના જણાવ્યા અનુસાર, ઈરાને બીમાર લોકો માટે મેડિકલ સામગ્રી અને અન્ય જરૂરી વસ્તુઓની મદદ માગી હતી. વેન્સે આ અંગે તેમની સલાહ લીધી હતી અને તેમણે મદદની મંજૂરી આપી દીધી. હોર્મુઝ નજીક દરિયાઈ બારૂદી સુરંગો સાથે અથડાઈને 3 ટેન્કરોમાં વિસ્ફોટ આ દરમિયાન, હોર્મુઝ સ્ટ્રેટ નજીક ત્રણ ટેન્કરોમાં વિસ્ફોટ થયા અને તેમાં આગ લાગી. ઈરાનના સરકારી મીડિયા અનુસાર, છેલ્લા 24 કલાક દરમિયાન આ ટેન્કરો સમુદ્રમાં બિછાવવામાં આવેલી બારૂદી સુરંગો સાથે અથડાઈ ગયા હતા. ઈરાનની ઇસ્લામિક રિવોલ્યુશનરી ગાર્ડ કોર્પ્સ (IRGC) એ જણાવ્યું કે ત્રણેય ટેન્કરો હોર્મુઝના દક્ષિણમાં એવા માર્ગ પરથી પસાર થવાનો પ્રયાસ કરી રહ્યા હતા, જેના ઉપયોગની મંજૂરી નહોતી. ઈરાની ગાર્ડના જણાવ્યા અનુસાર, ટેન્કરોએ પોતાના રડાર અને માર્ગદર્શક સિસ્ટમ બંધ કરી દીધી હતી. આ ઉપરાંત, તેમણે નેવીની ચેતવણીઓને પણ અવગણી હતી. —————————– આ સમાચાર પણ વાંચો… મિડટર્મ ચૂંટણીમાં મોંઘવારી-રોજગાર મુદ્દે ટ્રમ્પ બેકફૂટ પર:અર્લી વોટિંગમાં વિપક્ષી ડેમોક્રેટ્સ આગળ, હારના ડરે અમેરિકી રાષ્ટ્રપતિએ માગ્યો 30 રાજ્યોનો સિક્રેટ ડેટા! અમેરિકામાં 3 નવેમ્બરે મિડટર્મ ચૂંટણી યોજાવાની છે. તે પહેલાં જ અર્લી વોટિંગ શરૂ થઈ ગયું છે. અત્યાર સુધીમાં આશરે 4 કરોડ લોકો મતદાન કરી ચૂક્યા છે. રોયટર્સ અને ઇપ્સોસના સર્વે મુજબ, અર્લી વોટિંગમાં રાષ્ટ્રપતિ ટ્રમ્પની રિપબ્લિકન પાર્ટી પાછળ ચાલી રહી છે. વિપક્ષી ડેમોક્રેટ્સને 47% અને રિપબ્લિકન પાર્ટીને 36% મતદારોનું સમર્થન મળી રહ્યું છે. સંપૂર્ણ સમાચાર વાંચો…