અમેરિકામાં મૃત્યુદંડની સજા પામેલી એક મહિલા કેદીને બુધવારે મોતના 2 ઇન્જેક્શન આપવામાં આવ્યા, પરંતુ તેમ છતાં તેનું મૃત્યુ થયું નહીં. તેના હૃદયના ધબકારા ચાલુ રહ્યા અને તે ઊંઘમાં નસકોરાં લઈ રહી હતી. આ મામલો અમેરિકાના ટેનેસી રાજ્યનો છે. ક્રિસ્ટા ગેલ પાઈક નામની મહિલાને 1995માં હત્યાના કેસમાં દોષિત ઠેરવવામાં આવી હતી. એક વર્ષ બાદ તેને મૃત્યુદંડની સજા સંભળાવવામાં આવી હતી. જોકે હવે તેની સજા ટાળી દેવામાં આવી છે. મૃત્યુનું ઇન્જેક્શન આપતી વખતે શું થયું 1995માં 19 વર્ષની ક્લાસમેટની હત્યા કરી હતી ક્રિસ્ટા પાઈકને 1995માં પોતાની 19 વર્ષની ક્લાસમેટ કોલિન સ્લેમરની હત્યાના કેસમાં દોષિત ઠેરવવામાં આવી હતી. જાન્યુઆરી 1995માં પાઈક, તેમના તે સમયના બોયફ્રેન્ડ તાદારિલ શિપ અને એક મિત્રએ સ્લેમરને ટેનેસી યુનિવર્સિટીના કેમ્પસ નજીક આવેલા જંગલમાં બોલાવી હતી. અદાલતમાં સામે આવ્યું હતું કે ત્યાં ત્રણેયે સ્લેમરને માર માર્યો હતો અને ધારદાર વસ્તુથી હુમલો કર્યો હતો. ગુનો થયો ત્યારે પાઈક 18 વર્ષની હતી. જ્યારે તેમના બોયફ્રેન્ડ શિપની ઉંમર 17 વર્ષની હતી. શિપે બાદમાં આ કેસમાં સાક્ષી આપી હતી. સગીર હોવાને કારણે તેને મૃત્યુદંડ આપવામાં આવ્યો નહોતો અને આજીવન કેદની સજા ફટકારવામાં આવી હતી. ટેનેસીમાં 200 વર્ષ બાદ પહેલી વાર મહિલાને મૃત્યુદંડ પાઈક અમેરિકાના ટેનેસી રાજ્યમાં મૃત્યુદંડની સજા પામેલી એકમાત્ર મહિલા કેદી હતી. જો બુધવારે હાથ ધરવામાં આવેલી પ્રક્રિયા સફળ થઈ હોત અને પૂર્ણ થઈ હોત, તો 200 વર્ષથી વધુ સમય બાદ ટેનેસીમાં મૃત્યુદંડની સજા પામેલી કોઈ મહિલાને મૃત્યુદંડ આપવાનો આ પહેલો પ્રસંગ હોત. જેલમાં રહેતી વખતે પાઈકે પોતાના ગુના બદલ પસ્તાવો વ્યક્ત કર્યો હતો. તેમની માનસિક બીમારીઓની સારવાર પણ કરવામાં આવી હતી. તેમના વકીલોનું કહેવું હતું કે બાળપણમાં તેમની સાથે બનેલી કેટલીક ખરાબ ઘટનાઓ અને માનસિક પરેશાનીઓની તેમના વર્તન પર અસર પડી હતી. બીજી તરફ, પીડિતા કોલીન સ્લેમરના પરિવારે પાઈકને મૃત્યુદંડ આપવાનું સમર્થન કર્યું હતું. સ્લેમરની માતાએ કહ્યું હતું કે પાઈક તેમની દીકરીને પાછી લાવી શકતી નથી, તેથી તેમને પોતાના કૃત્યની સજા મળવી જોઈએ. આ વર્ષે થનારી બાકીની સજાઓ પર રોક ટેનેસી અમેરિકાના એવા રાજ્યોમાંનું એક છે, જ્યાં તાજેતરના વર્ષોમાં મૃત્યુદંડની સજા આપવામાં આવી છે. ઑગસ્ટમાં ટેનેસી, અલાબામા અને ઓક્લાહોમામાં એક જ દિવસે ત્રણ લોકોને મૃત્યુદંડની સજા આપવામાં આવી હતી. અમેરિકામાં 10 વર્ષથી વધુ સમય બાદ પહેલી વાર એક જ દિવસે ત્રણ લોકોને મૃત્યુદંડની સજા આપવામાં આવી હતી. ટેનેસીના ગવર્નરે હવે પાઈકને ઘાતક ઇન્જેક્શન આપતી વખતે આખરે શું થયું તેની તપાસના આદેશ આપ્યા છે. તેમણે જણાવ્યું કે આ વર્ષે થનારી બાકીની તમામ મૃત્યુદંડની સજાઓ પર હાલ પૂરતી રોક લગાવી દેવામાં આવી છે. પાઈકના વકીલોએ બુધવારે મોડી રાત્રે કોર્ટમાં દાખલ કરાયેલા દસ્તાવેજોમાં જણાવ્યું કે અધિકારીઓએ તેને પેન્ટોબાર્બિટલ દવાના 2 ઇન્જેક્શન આપ્યા હતા. તેમ છતાં તેનું મૃત્યુ થયું નહીં. ટેનેસી ડિપાર્ટમેન્ટ ઑફ કરેકશને જણાવ્યું કે અધિકારીઓએ કોર્ટે મંજૂર કરેલી મૃત્યુદંડના ઇન્જેક્શનની પ્રક્રિયાના દરેક પગલાનું પાલન કર્યું હતું. પરંતુ તેમ છતાં પ્રક્રિયા નિષ્ફળ ગઈ. અમેરિકામાં ઇન્જેક્શન આપ્યા બાદ પણ વ્યક્તિના જીવિત બચી જવાનો આ પહેલો મામલો ડેથ પેનલ્ટી ઇન્ફોર્મેશન સેન્ટરની કાર્યકારી નિર્દેશિકા રોબિન એમ. માહેરે આને અત્યંત અસાધારણ મામલો ગણાવ્યો. તેમના જણાવ્યા અનુસાર, અત્યાર સુધીમાં 7 એવા લોકો રહ્યા છે જેમની નસમાં મૃત્યુદંડનું ઇન્જેક્શન આપવામાં મુશ્કેલી પડી હતી અને પ્રક્રિયા દરમિયાન મેડિકલ ટીમની ભૂલને કારણે તેઓ બચી ગયા હતા. પરંતુ મૃત્યુદંડના ઇન્જેક્શનમાં ઉપયોગમાં લેવાતી દવા શરીરમાં પહોંચી ગયા બાદ પણ કોઈ વ્યક્તિ જીવિત રહી હોય એવો મામલો અગાઉ ક્યારેય સામે આવ્યો નહોતો. રાજ્યના નિયમો મુજબ, પ્રથમ ઇન્જેક્શન પછી જો કેદીનું મૃત્યુ ન થાય તો બીજું ઇન્જેક્શન આપવામાં આવે છે. પરંતુ બીજા ઇન્જેક્શન પછી પણ વ્યક્તિ જીવિત રહે તો શું કરવું, તે અંગે નિયમોમાં સ્પષ્ટ માહિતી નથી.