અમેરિકાના અમીર પરિવારોમાં વધુ બાળકો પેદા કરવાની પ્રથા વધી રહી છે. તેમના માટે આ પ્રતિષ્ઠાની નિશાની છે. એક્સિઓસના અહેવાલ મુજબ અમેરિકાના સૌથી અમીર 1% પરિવારોમાંથી લગભગ અડધા પરિવારોને 3 કે તેથી વધુ બાળકો છે. બીજી તરફ, ઓછી આવક ધરાવતા વર્ગમાં ત્રણ બાળકો ધરાવતા પરિવારોની સંખ્યા આશરે 40થી 43% છે. અમેરિકામાં એક પરિવાર એક બાળકના ઉછેર પાછળ 18 વર્ષ સુધી કરોડો રૂપિયા ખર્ચે છે. મધ્યમવર્ગીય પરિવાર માટે મોંઘવારીના આ સમયમાં આટલી મોટી રકમ ચૂકવવી લગભગ અશક્ય છે. અમીરોમાં વધુ બાળકોની પ્રથા 90ના દાયકાથી ચાલુ રિપોર્ટ મુજબ, અમેરિકાના સૌથી અમીર પરિવારોમાં વધુ બાળકો રાખવાનું ચલણ 1990ના દાયકાથી ચાલ્યું આવે છે. પરંતુ ઓછી આવક ધરાવતા પરિવારોમાં આ ચલણ ઘટી રહ્યું છે. એટલે કે બાળકો ઉછેરવાનો ખર્ચ વધવા છતાં અમીર પરિવારો પહેલાની જેમ મોટા પરિવારો રાખી રહ્યા છે. અર્થશાસ્ત્રી માઈક કોન્ઝલનું કહેવું છે કે અમીર પરિવારો માટે ત્રીજું બાળક સ્ટેટસ સિમ્બોલ એટલે કે પ્રતિષ્ઠાની નિશાની બની ગયું છે. તેમના મુજબ, મોંઘવારી અને બાળકોના ઉછેરનો વધતો ખર્ચ સામાન્ય પરિવારોને ઓછાં બાળકો પેદા કરવા માટે મજબૂર કરી રહ્યો છે, પરંતુ તેની અસર સૌથી અમીર 1% પરિવારો પર એટલી પડતી નથી. મધ્યમવર્ગીય પરિવારોએ પોતાની આવકમાં ઘરનું ભાડું, બિલ, બચત અને બાળકોની જરૂરિયાતો વચ્ચે સંતુલન જાળવવું પડે છે. ત્રીજું બાળક થવાથી આ ખર્ચનો બોજો વધુ વધી જાય છે. બાળકો પર દર વર્ષે 15 લાખ રૂપિયા ખર્ચવા પડે છે અમેરિકન કંપની લેન્ડિંગટ્રીના અહેવાલ મુજબ અમેરિકામાં એક બાળકને જન્મથી 18 વર્ષની ઉંમર સુધી ઉછેરવામાં સરેરાશ ₹3 કરોડનો ખર્ચ થાય છે. આ હિસાબે દર વર્ષે આશરે 15 લાખ રૂપિયા ખર્ચવા પડે છે. આમાં બાળકના ખોરાક, ઘર, આવનજાવન, આરોગ્ય વીમા અને સંભાળ જેવા ખર્ચનો સમાવેશ થાય છે. જોકે, આ સરેરાશ અંદાજ છે. દરેક પરિવારનો ખર્ચ તેની આવક, રહેવાની જગ્યા અને બાળકોની જરૂરિયાતો મુજબ અલગ હોઈ શકે છે. શરૂઆતના 5 વર્ષમાં સૌથી વધુ ખર્ચ થાય છે રિપોર્ટ મુજબ બાળકના જન્મ પછીના શરૂઆતના વર્ષોમાં ખર્ચ વધુ હોય છે. પ્રથમ પાંચ વર્ષમાં બાળકના ઉછેર પાછળ દર વર્ષે સરેરાશ આશરે 26 લાખ રૂપિયા ખર્ચ થાય છે. તેનું મુખ્ય કારણ બાળકની સંભાળ માટે ડે-કેર અથવા અન્ય સેવાઓ પાછળ થતો ખર્ચ છે. ત્યાર બાદ 6થી 18 વર્ષની ઉંમર દરમિયાન સરેરાશ વાર્ષિક ખર્ચ ઘટીને આશરે 10.7 લાખ રૂપિયા થઈ જાય છે. આ સમયગાળામાં પણ ખોરાક, ઘર, આવન-જાવન અને આરોગ્ય સંબંધિત ખર્ચ ચાલુ રહે છે.