આતંકવાદી સંગઠન અલ-કાયદાએ ફ્લાયદુબઈની ફ્લાઇટમાં ભારતીય પાઇલટ સ્મિત મચ્છર પર હુમલો કરનાર ઓમાની કો-પાઇલટ હમામ અલ-હમામીની પ્રશંસા કરી. ન્યૂયોર્ક પોસ્ટ અનુસાર, અલ-કાયદા સાથે જોડાયેલા મેગેઝિન અલ-બયાનમાં લખવામાં આવ્યું છે કે યુદ્ધ હજુ સમાપ્ત થયું નથી. અમેરિકન અને ઇઝરાયલી વિમાનો પર 9/11 જેવા હુમલા કરવામાં આવવા જોઈએ. જે દેશો ઇસ્લામ વિરુદ્ધ છે, તેમના વિમાનો પર હુમલો કરો મેગેઝિનમાં અમેરિકા, ઇઝરાયલ સહિત એવા દેશોના વિમાનોને નિશાન બનાવવાની અપીલ કરવામાં આવી છે, જેમને ઇસ્લામ વિરુદ્ધ માનવામાં આવે છે. આ મેગેઝિન અરબી ભાષામાં પ્રકાશિત થાય છે. તેમાં લખવામાં આવ્યું છે કે ઇઝરાયલ, અમેરિકા અને ઇસ્લામ સામે લડનારા અન્ય દેશોના લોકોને લઈ જતા વિમાનો હજુ પણ આકાશમાં ઉડી રહ્યા છે અને તેમને નિશાન બનાવવામાં આવી શકે છે, જેમ કે 11 સપ્ટેમ્બર અને 30 સપ્ટેમ્બરના રોજ થયું હતું. આ સંદેશ સાથે એક તસવીર પણ મૂકવામાં આવી હતી, જેમાં ન્યૂયોર્કના વર્લ્ડ ટ્રેડ સેન્ટરના ટ્વિન ટાવર્સ સાથે વિમાન અથડાતું દેખાતું હતું. બીજી તસવીર ફ્લાયદુબઈની ઘટના સાથે સંબંધિત હતી. ન્યૂયોર્ક પોસ્ટ અનુસાર, મેગેઝિને એ પણ લખ્યું છે કે અમેરિકા અને ઇઝરાયલના દુશ્મનો પહેલાં કરતાં વધુ છે. તેમાં અમેરિકાને ‘દુષ્ટતાનું સામ્રાજ્ય’ ગણાવીને તેના અંતની વાત લખવામાં આવી છે. હમામ અલ-હમામી વિમાન ક્રેશ કરવા માંગતો હતો 30 સપ્ટેમ્બરે ફ્લાયદુબઈની ફ્લાઇટ FZ1073 દુબઈથી તેલ અવીવ જઈ રહી હતી. આ દરમિયાન ઓમાની કો-પાઇલટ હમામ અલ-હમામીએ ભારતીય કેપ્ટન સ્મિત મચ્છર પર કુહાડી વડે કોકપિટમાં હુમલો કર્યો હતો અને વિમાનને પોતાના કબજામાં લઈને તેને ક્રેશ કરવાનો પ્રયાસ કર્યો હતો. ભારતીય કેપ્ટન ઘાયલ હોવા છતાં કોકપિટનો દરવાજો ખોલવામાં સફળ રહ્યા હતા. ત્યારબાદ મુસાફરો અને ક્રૂની મદદથી વિમાનને સાઉદી અરેબિયાના તબુકમાં સુરક્ષિત રીતે ઉતારવામાં આવ્યું હતું. ફ્લાઇટરડાર 24 મુજબ, હુમલા દરમિયાન વિમાન લગભગ એક મિનિટમાં 33 હજાર ફૂટથી 17 હજાર ફૂટ સુધી નીચે આવી ગયું હતું. હમામીના અલ-કાયદા સાથેના કનેક્શનની તપાસ થઈ રહી છે હમામ અલ-હમામી UAEની કસ્ટડીમાં છે. તેના સોશિયલ મીડિયા અકાઉન્ટ્સ પણ તપાસના દાયરામાં છે. અહેવાલો મુજબ, તેના અકાઉન્ટ્સ પર અલ-કાયદાના ઘણા આતંકવાદીઓની તસવીરો મળી આવી હતી. તેમાં ઓસામા બિન લાદેન અને અયમાન અલ-ઝવહિરીની તસવીરો પણ સામેલ છે. ઇઝરાયલી વડાપ્રધાન બેન્જામિન નેતન્યાહૂએ કહ્યું છે કે હુમલાખોર ઇસ્લામિક કટ્ટરપંથથી પ્રભાવિત હતો. તેનો ઇરાદો મુસાફરો સહિત વિમાનને ક્રેશ કરવાનો હતો. તપાસમાં સામે આવ્યું છે કે ફ્લાયદુબઈમાં જોડાતા પહેલાં અલ-હમામી ઓમાન એર અને મોરોક્કોની એરલાઇન રોયલ એર મરોકમાં કામ કરી ચૂક્યો હતો. તે લગભગ 8 મહિના પહેલાં ફ્લાયદુબઈ સાથે જોડાયો હતો. રિપોર્ટ્સ અનુસાર, ઓમાન એર ખાતે કામ કરતી વખતે તેના કટ્ટરપંથી વિચારોને લઈને ચિંતા વ્યક્ત કરવામાં આવી હતી. ત્યારબાદ તેને ફરજ પરથી હટાવીને વહીવટી કામ સોંપવામાં આવ્યું હતું. હવે એ સવાલ પણ ઉઠી રહ્યો છે કે જ્યારે હમામી અંગે અગાઉથી જ ચિંતા વ્યક્ત કરવામાં આવી હતી, તો તે ફ્લાયદુબઈમાં પાઇલટ કેવી રીતે બન્યો અને તેને ઇઝરાયલ જતી ફ્લાઇટ ઉડાવવાની જવાબદારી કેવી રીતે સોંપવામાં આવી. ઓમાની કો-પાઇલટ સ્ટુડન્ટ વિઝા પર ઓસ્ટ્રેલિયા ગયો હતો, સીરિયામાં પણ સમય વિતાવ્યો હતો ઓમાની કો-પાઇલટ હમામ અલ-હમામીને લઈને ઓસ્ટ્રેલિયામાં પણ આતંકવાદ સંબંધિત તપાસ શરૂ કરવામાં આવી છે. એજન્સીઓ એ જાણવા માટે તપાસ કરી રહી છે કે ઓસ્ટ્રેલિયામાં રહેતી વખતે શું તે કટ્ટરપંથી વિચારોના સંપર્કમાં આવ્યો હતો. હમામને 2014માં ઓસ્ટ્રેલિયાનો સ્ટુડન્ટ વિઝા મળ્યા હતા. તેણે 2015થી 2017 સુધી ત્યાં અભ્યાસ કર્યો હતો. 2019માં તેનો વિઝા રદ કરવામાં આવ્યા હતા. તપાસ એજન્સીઓ તેના સીરિયા સાથેના સંબંધોની પણ તપાસ કરી રહી છે. હમામના પિતા ઓમાની અને માતા સીરિયન હતાં. તેણે સીરિયામાં પણ થોડો સમય વિતાવ્યો હતો. એજન્સીઓ એ જાણવાનો પ્રયાસ કરી રહી છે કે તેના કટ્ટરપંથી વિચારો ત્યાં રહેવા દરમિયાન વિકસ્યા હતા કે નહીં.