અમેરિકી નાણા મંત્રી સ્કોટ બેસેન્ટે કેનેડાની સરખામણી નાના કૂતરા સાથે કરી. અમેરિકા સાથે કેનેડાની ટ્રેડ ડીલ ન થવા પર તેમણે કેનેડાની સરખામણી મોટા કૂતરાને પરેશાન કરનાર ભસતા નાના કૂતરા સાથે કરી. ફોક્સ ન્યૂઝને આપેલા ઇન્ટરવ્યુમાં બેસેન્ટે કહ્યું- મારી પાસે એક જર્મન શેફર્ડ કૂતરો હતો. પાર્કમાં એક નાનો કૂતરો તેના પર સતત ભસતો રહેતો હતો. આ સ્થિતિ મને તેની જ યાદ અપાવે છે. ઘણા સમય સુધી જર્મન શેફર્ડ તેને અવગણે છે. પછી એક દિવસ તેની પણ ધીરજ ખૂટી ગઈ. તેમણે કેનેડિયન વડાપ્રધાન માર્ક કાર્ની પર શ્રેષ્ઠ વેપાર કરારને ઠુકરાવવાનો આરોપ પણ લગાવ્યો. વાસ્તવમાં, અમેરિકા અને કેનેડા વચ્ચે 19-21 ઓગસ્ટમાં થયેલી ત્રણ દિવસની વેપાર વાટાઘાટો પછી ડીલ થઈ શકી ન હતી. પીએમ માર્ક કાર્નીનું કહેવું હતું કે અમેરિકાએ છેલ્લી ઘડીએ ડીલની શરતો બદલી દીધી હતી. જ્યારે અમેરિકાએ કહ્યું કે તેમણે સારી ઓફર આપી હતી. બેસેન્ટ બોલ્યા- કેનેડિયન ટેરિફની અમેરિકા પર અસર નહીં અમેરિકી નાણા મંત્રી બેન્સેટે એમ પણ કહ્યું કે કેનેડા સાથેના વ્યાપાર યુદ્ધની અમેરિકાની કિંમતો પર બહુ ઓછી અસર થશે. અમેરિકી નાણા મંત્રી બેસેન્ટનું આ નિવેદન એવા સમયે આવ્યું છે, જ્યારે છેલ્લા કેટલાક સમયથી તેમનું અને કેનેડિયન વડાપ્રધાન માર્ક કાર્નીનું એકબીજા પર નિવેદનો આપવાનો સિલસિલો ચાલુ છે. આ પહેલા પણ બેસેન્ટે કાર્ની પર આરોપ લગાવ્યો હતો કે તેઓ કેનેડાની અર્થવ્યવસ્થા માટે શું સારું છે, તેના બદલે પોતાની રાજકીય છબીની વધુ ચિંતા કરે છે. ટ્રમ્પે કેનેડા પર 50% ટેરિફ લગાવ્યો અમેરિકી રાષ્ટ્રપતિ ડોનાલ્ડ ટ્રમ્પે બંને દેશો વચ્ચે વ્યાપાર કરાર ન થયા પછી 22 ઓગસ્ટથી કેનેડાના 20 અબજ ડોલર (લગભગ 1.9 લાખ કરોડ રૂપિયા)ના સામાન પર 50% ટેરિફ લાગુ કરી દીધો હતો. આ ટેરિફ કેનેડા દ્વારા અમેરિકા મોકલવામાં આવતા કુલ સામાનના લગભગ 5% છે. પીએમ કાર્નીએ આ ટેરિફને કેનેડા પર હુમલો ગણાવ્યો. તેમણે અમેરિકા સાથે વધતા વેપાર વિવાદ અંગે કહ્યું, “અમે યુદ્ધમાં છીએ, કારણ કે અમારા પર હુમલો થયો છે.” અમેરિકાએ કેનેડા પર આટલો બધો ટેરિફ શા માટે લગાવ્યો? અમેરિકાનું કહેવું છે કે કેનેડાની કેટલીક વેપાર નીતિઓ અમેરિકન કંપનીઓ માટે નુકસાનકારક છે. બંને દેશો વચ્ચે ઘણા મુદ્દાઓ પર લાંબા સમયથી વિવાદ ચાલી રહ્યો છે. આમાં ઓટોમોબાઈલ, ડેરી ઉત્પાદનો, દારૂ અને લાકડાનો વેપાર મુખ્ય છે. અમેરિકાએ પહેલા 20 ઓગસ્ટથી નવા ટેરિફ લગાવવાની જાહેરાત કરી હતી. જોકે, ડેડલાઇન પહેલા જ બંને દેશોએ વાતચીત શરૂ કરવાનો નિર્ણય કર્યો. આ પછી ટ્રમ્પે ટેરિફ લાગુ કરવાની સમયમર્યાદા 3 દિવસ વધારી દીધી, જેથી સમજૂતીનો પ્રયાસ કરી શકાય. અમેરિકી અધિકારીઓ અનુસાર, ઘણા મુદ્દાઓ પર સહમતિ બની ગઈ હતી, પરંતુ કેટલાક મહત્વના મામલાઓમાં બંને દેશો એકબીજાની શરતો પર સહમત થઈ શક્યા નહીં. 1. અમેરિકી કારો સાથે ભેદભાવનો આરોપ ૨. કેનેડાનું તેના ડેરી માર્કેટને સંરક્ષણ 3. અમેરિકન દારૂના વેચાણ પર પ્રતિબંધ અમેરિકા-કેનેડા વચ્ચે 3 અન્ય મોટા વિવાદો 1. કેનેડાને 51મું રાજ્ય કહેવું ટ્રમ્પ ઘણી વાર કેનેડાને અમેરિકાનું 51મું રાજ્ય બનાવવાની વાત કહી ચૂક્યા છે. ટ્રમ્પનું કહેવું છે કે અમેરિકા વેપારના મામલે કેનેડાને અબજો ડોલરનો ફાયદો પહોંચાડે છે. જો કેનેડા અમેરિકાનો ભાગ બની જાય છે, તો આ વ્યાપારી અસમાનતા અને ટેરિફ સાથે જોડાયેલા વિવાદો આપમેળે સમાપ્ત થઈ જશે. 2. ટ્રુડોને કેનેડાના ગવર્નર કહેવું ટ્રમ્પે ઘણી વાર કેનેડાના તત્કાલીન વડાપ્રધાન જસ્ટિન ટ્રુડોને વ્યંગાત્મક લહેજામાં ‘ગવર્નર’ કહીને સંબોધિત કર્યા હતા. કેનેડિયન નેતાઓ અને જનતાએ આને પોતાની સાર્વભૌમત્વનું અપમાન માન્યું. 3. સરહદી સુરક્ષા, ગેરકાયદેસર ઘૂસણખોરી અને ફેન્ટાનીલની તસ્કરી અમેરિકા અને કેનેડા વચ્ચે વધતી સરહદી સુરક્ષા ચિંતાઓ પણ મોટા વિવાદનું કારણ બની છે. ટ્રમ્પ પ્રશાસનનો આરોપ રહ્યો છે કે કેનેડાની ઉત્તરી સરહદથી ગેરકાયદેસર પ્રવાસીઓની ઘૂસણખોરી અને ખતરનાક નશીલી દવાઓ (ખાસ કરીને ફેન્ટાનીલ)ની તસ્કરી અમેરિકામાં વધી રહી છે. અમેરિકાએ કેનેડા પાસેથી પોતાની સરહદો પર કડક દેખરેખ અને કડક ઇમિગ્રેશન નીતિઓ લાગુ કરવાની માંગ કરી છે.