ઇઝરાયલે શનિવારે હવાઈ હુમલામાં હમાસના એક આતંકવાદીને ઠાર માર્યો છે. ઇઝરાયલી સેનાએ (IDF) રવિવારે આ માહિતી આપતાં જણાવ્યું કે આતંકવાદીની ઓળખ સાહેર નિદાલ લત્ફી સાકર તરીકે થઈ છે. IDF મુજબ, સાકરે 7 ઓક્ટોબર 2023ના રોજ નોઆ અર્ગમાની અને તેમના સાથી અવિનાતન ઓરને નોવા મ્યુઝિક ફેસ્ટિવલમાંથી અપહરણ કર્યા હતા. તેણે બંનેને મોટરસાઇકલ પર બેસાડ્યા અને બળજબરીથી ગાઝા લઈ ગયો હતો. IDFએ જણાવ્યું કે સાકર ગાઝામાં વિશ્વભરમાં સક્રિય જેહાદી સંગઠનો સાથે જોડાયેલો હતો. યુદ્ધ દરમિયાન તે હમાસ સુધી હથિયારો પહોંચાડતો હતો. આ ઉપરાંત ઇઝરાયલી સૈનિકો અને સામાન્ય નાગરિકો પરના હુમલાની તૈયારીમાં પણ તેની મહત્વપૂર્ણ ભૂમિકા હતી. મ્યુઝિક ફેસ્ટિવલ દરમિયાન હમાસે હુમલો કર્યો હતો 7 ઓક્ટોબર 2023ના રોજ હમાસે ઇઝરાયલમાં સરહદી વિસ્તારમાં એક મ્યુઝિક ફેસ્ટિવલ દરમિયાન હુમલો કર્યો હતો. આ હુમલામાં આશરે 1200 લોકો માર્યા ગયા હતા, જ્યારે 251 લોકોને બંધક બનાવી લેવામાં આવ્યા હતા. આ હુમલો ઇઝરાયલ માટે દાયકાઓમાં બનેલી સૌથી ગંભીર સુરક્ષા ઘટનાઓમાંની એક હતો. ત્યારબાદ ઇઝરાયલે ગાઝામાં હમાસ વિરુદ્ધ મોટું સૈન્ય અભિયાન શરૂ કર્યું. જોતજોતામાં આ સંઘર્ષ સમગ્ર પશ્ચિમ એશિયા માટે મોટા સંકટમાં બદલાઈ ગયો. હમાસે તેને ‘અલ-અક્સા ફ્લડ’ ઓપરેશન નામ આપ્યું હતું. તેના જવાબમાં ઇઝરાયલે થોડા કલાકો બાદ હમાસ વિરુદ્ધ ‘સોર્ડ્સ ઑફ આયર્ન’ ઓપરેશન શરૂ કર્યું હતું. 2023ના હમાસ હુમલાની તસવીરો… ઇઝરાયલી સેનાએ 2024માં નોઆને બચાવી હતી 25 વર્ષની નોઆ અર્ગામાનીને 8 જૂન 2024ના રોજ ઇઝરાયલી સેનાએ ‘ઓપરેશન અર્નોન’ હેઠળ ગાઝામાંથી રેસ્ક્યુ કરી હતી. આ ઓપરેશનમાં નોઆ ઉપરાંત 7 ઓક્ટોબરે અપહરણ કરાયેલા ઇઝરાયલી નાગરિકો આન્દ્રેઈ કોઝ્લોવ, અલ્મોગ મીર જાન અને શ્લોમી ઝિવને પણ મુક્ત કરવામાં આવ્યા હતા. બીજી તરફ, નોઆના સાથી અવિનાતન ઓરને ઓક્ટોબર 2025માં અમેરિકી રાષ્ટ્રપતિ ટ્રમ્પની ગાઝા ડીલ હેઠળ મુક્ત કરવામાં આવ્યો હતો. બચાવ અભિયાનનું નામ શહીદ સૈનિકના નામ પર રાખવામાં આવ્યું ‘ઓપરેશન અર્નોન’ 8 જૂન 2024ના રોજ ઇઝરાયલી સેનાએ ગાઝાના નુસૈરાત વિસ્તારમાં હાથ ધર્યું હતું. આ ઓપરેશનનો હેતુ હમાસના કબજામાંથી ઇઝરાયલી બંધકોને છોડાવવાનો હતો. આ બચાવ અભિયાનને અંજામ આપવા માટે ઇઝરાયલી સેના, સુરક્ષા એજન્સી શિન બેટ અને ઇઝરાયલી પોલીસની વિશેષ દળ યામામે સાથે મળીને કામ કર્યું હતું. આ ઓપરેશનનું નામ યામામના કમાન્ડર અર્નોન જમીરાના નામ પરથી રાખવામાં આવ્યું હતું. ગાઝામાં બંધકોને મુક્ત કરાવતી વખતે તેઓ હમાસના ગોળીબારમાં ગંભીર રીતે ઘાયલ થયા હતા. તેમને હેલિકોપ્ટર દ્વારા ઇઝરાયલની હોસ્પિટલમાં લઈ જવામાં આવ્યા હતા, પરંતુ થોડા કલાકો બાદ તેમનું મૃત્યુ થયું હતું. નોઆના અપહરણમાં સામેલ એક આતંકવાદી અગાઉ પણ માર્યો જઈ ચૂક્યો છે ઇઝરાયલી સેનાના જણાવ્યા અનુસાર, જુલાઈ 2026માં પણ નોઆ અને અન્ય બંધકોના અપહરણ સાથે જોડાયેલા આતંકવાદીઓને હવાઈ હુમલામાં ઠાર મારવામાં આવ્યા હતા. તેમાં અહમદ હુસૈન મોહમ્મદ કાફિના પણ સામેલ હતો. તે મુજાહિદ્દીન બ્રિગેડનો કમાન્ડર હતો અને 7 ઓક્ટોબરના હુમલા દરમિયાન ઇઝરાયલમાં ઘૂસ્યો હતો. IDFએ જણાવ્યું કે કાફિનાએ નોઆ અર્ગમાની અને અવિનાતન ઓરના અપહરણમાં પણ ભાગ લીધો હતો.