તાપી જિલ્લાના ઉકાઈ તાલુકાના વાડી ભેંસરોડ ગામમાં એક દીપડો પાંજરે પુરાયો છે. ગામના ડુંગળી ફળિયામાં પ્રવીણભાઈ ગામીતના ઘર બહાર વન વિભાગ દ્વારા મૂકવામાં આવેલા પાંજરામાં રાત્રે દીપડો ફસાયો હતો. આ ઘટનાથી ગ્રામજનોએ રાહતનો શ્વાસ લીધો છે.નોંધનીય છે કે, છેલ્લા એક જ મહિનાના ટૂંકા ગાળામાં આ જ ગામમાં અલગ-અલગ ત્રણ દીપડા પાંજરે પુરાવાની આ ત્રીજી ઘટના છે. આ પહેલા પણ દીપડાની દહેશતથી ગ્રામજનોમાં ભયનો માહોલ છવાયેલો હતો. દીપડો પાંજરે પુરાયાની જાણ થતાં જ ગ્રામજનોએ તાત્કાલિક વન વિભાગને જાણ કરી હતી. માહિતી મળતાની સાથે જ ગુણસતા બીટ વન વિભાગની ટીમ ઘટનાસ્થળે પહોંચી હતી. વન વિભાગની ટીમે સુરક્ષિત રીતે દીપડાનો કબજો સંભાળી આગળની કાર્યવાહી હાથ ધરી હતી. એક જ મહિનામાં ત્રણ દીપડા પકડાઈ જતાં વાડી ભેંસરોડ અને આસપાસના પંથકના લોકોમાં ખુશી જોવા મળી રહી છે.સ્થાનિકોએ વન વિભાગની સમયસરની સક્રિય કામગીરીને બિરદાવી છે. બીજી તરફ, વન વિભાગ દ્વારા ગ્રામજનોને સાવચેત રહેવા અને જંગલી પ્રાણીઓ નજરે પડે તો ગભરાયા વગર સુરક્ષિત અંતર જાળવી ત્વરિત વન વિભાગને જાણ કરવા અપીલ કરવામાં આવી છે.