PM નરેન્દ્ર મોદી 11-12 ડિસેમ્બરે કેનેડાના પ્રવાસે રહેશે. વડાપ્રધાનને આવકારવા કેનેડિયન હિન્દુ ચેમ્બર ઓફ કોમર્સ ઉત્સાહિત છે. 11 ડિસેમ્બરના રોજ એક કાર્યક્રમનું આયોજન કરવામાં આવ્યું છે. ટોરોન્ટો કેનેડા અને ભારત વચ્ચેની મિત્રતાની ઉજવણી કરતા એક એવા પ્રસંગનું સ્વાગત કરવા માટે તૈયારી કરી રહ્યું છે, જે સમુદાયના નેતાઓ, સંસ્થાઓ, પરિવારો અને તમામ ક્ષેત્રોમાંથી આવતા કેનેડિયનોને એકસાથે લાવે છે. સહિયારા લોકશાહી મૂલ્યો, સાંસ્કૃતિક સંબંધો અને પેઢીઓ જૂના લોકોથી લોકો વચ્ચેના જોડાણ ધરાવતો આ સંગમ, કેનેડાના વિકાસ, સમૃદ્ધિ અને જીવંત બહુસંસ્કૃતિવાદી ઓળખમાં ભારતીય ડાયસ્પોરાના અસાધારણ યોગદાનને બિરદાવે છે. આ માત્ર સહિયારા વારસાની ઉજવણી નથી, પરંતુ ભવિષ્યમાં વધુ મજબૂત સંબંધો, નવી તકો અને સહયોગ, સમજણ તથા પરસ્પર આદર દ્વારા આકાર પામતા ભવિષ્ય તરફ જોવાની એક તક છે. સાથે મળીને, આપણે એ લોકો, ભાગીદારીઓ અને શક્યતાઓની ઉજવણી કરીએ છીએ જે કેનેડા અને ભારતને સતત જોડવાનું કામ કરે છે. CHCCના નરેશ ચાવડાના જણાવ્યા અનુસાર, આ કાર્યક્રમમાં ભાગ લેવા માટે https://www.canadawelcomesmodi.ca/ પર રજીસ્ટ્રેશન શરૂ થઈ ગયું છે, જેનો રજીસ્ટ્રેશન કોડ 86360275 છે. આ ઉપરાંત PM મોદીના કેનેડાના પ્રવાસ દરમિયાન બંને દેશો વચ્ચે ટ્રેડ ડીલ પર વાતચીત થશે. ભારત-કેનેડા વ્યાપાર સમજૂતી (CEPA) પર હસ્તાક્ષર થવાની સંભાવના પણ છે. તેના હેઠળ બંને દેશો વેપાર, રોકાણ અને કારોબાર વધારવા માટે નિયમો નક્કી કરે છે. ભારત અને કેનેડા 2030 સુધીમાં પરસ્પર વેપાર વધારીને વાર્ષિક 7 લાખ કરોડ રૂપિયા કરવા માંગે છે. હાલમાં બંને દેશો વચ્ચે આશરે 3 લાખ કરોડ રૂપિયાનો વેપાર થાય છે. PM મોદીનો પ્રવાસ એવા સમયે થઈ રહ્યો છે જ્યારે કેનેડા અને અમેરિકા વચ્ચે ટ્રેડ વોરની સ્થિતિ છે. ટ્રમ્પના ટેરિફના દબાણ વચ્ચે કેનેડા નવા બજારો શોધી રહ્યું છે. PM મોદીએ માર્ક કાર્ની સાથે ફોન પર વાત કરી હતી વડાપ્રધાન મોદી અને કેનેડાના વડાપ્રધાન માર્ક કાર્ની વચ્ચે 13 ઓક્ટોબરે ફોન પર વાતચીત થઈ. મોદીએ તેને સારી વાતચીત ગણાવી. બંને નેતાઓએ વેપાર, ઊર્જા, ટેક્નોલોજી, સુરક્ષા અને બંને દેશોના લોકો વચ્ચે સંપર્ક વધારવા પર સહમતિ વ્યક્ત કરી. કેનેડાના વડાપ્રધાન કાર્યાલય અનુસાર, બંને નેતાઓ ઇચ્છે છે કે ભારત અને કેનેડા વચ્ચેના વેપાર કરાર અંગેની વાટાઘાટો વહેલી તકે પૂર્ણ થાય. વાતચીત દરમિયાન હિંદ-પ્રશાંત ક્ષેત્રની પરિસ્થિતિ અંગે પણ ચર્ચા થઈ. કાર્નીએ રશિયા-યુક્રેન યુદ્ધનો શાંતિપૂર્ણ ઉકેલ લાવવાના પ્રયાસો માટે મોદીની પ્રશંસા પણ કરી. PM મોદીનો 11 વર્ષ બાદ દ્વિપક્ષીય પ્રવાસ જૂન 2025 – PM મોદીનો આ દ્વિપક્ષીય પ્રવાસ નહોતો. તેઓ G7 સમિટમાં ભાગ લેવા ગયા હતા. જોકે બેઠકની બહાર તેમણે PM કાર્ની સાથે મુલાકાત કરી હતી. એપ્રિલ 2015 – PM મોદી કેનેડાના દ્વિપક્ષીય પ્રવાસે ગયા હતા. તે સમયે કેનેડાના વડાપ્રધાન સ્ટીફન હાર્પર હતા. આ પ્રવાસ બાદ ભારતે કેનેડા પાસેથી યુરેનિયમ ખરીદવાનો કરાર પણ કર્યો હતો.