અબડાસા તાલુકાના સીમાવર્તી વિસ્તારમાં ગૌચર જમીન પર થયેલા ગેરકાયદેસર દબાણ સામે પશ્ચિમ કચ્છ પોલીસ અને વહીવટી તંત્ર દ્વારા સંયુક્ત કાર્યવાહી હાથ ધરવામાં આવી હતી. કોઠારા અને ભેદી ગામની સીમમાં આવેલી સરકારી ગૌચર જમીન પર ખેતીના હેતુથી કરવામાં આવેલા દબાણો દૂર કરી અંદાજે 400 એકર જમીનને દબાણમુક્ત કરવામાં આવી છે. સરકારી તંત્રના જણાવ્યા મુજબ આ જમીનની અંદાજિત કિંમત ₹1 કરોડ 20 લાખ જેટલી થાય છે. પશ્ચિમ કચ્છ પોલીસના જણાવ્યા અનુસાર સરહદી વિસ્તારની સુરક્ષા તેમજ સરકારી જમીન પરના ગેરકાયદેસર કબજાઓને ધ્યાનમાં રાખીને આ કાર્યવાહી હાથ ધરવામાં આવી હતી. પોલીસ મહાનિરીક્ષક ચિરાગ કોરડીયા, પશ્ચિમ કચ્છ પોલીસ અધિક્ષક વિકાસ સુંડા અને નલિયા વિભાગના નાયબ પોલીસ અધિક્ષક મનિષા દેસાઈના માર્ગદર્શન હેઠળ કામગીરી કરવામાં આવી હતી. કોઠારા પોલીસ મથકના પોલીસ ઇન્સ્પેક્ટર પી.કે. રાડા સહિતના પોલીસ સ્ટાફે કોઠારા ગ્રામ પંચાયત અને અબડાસા તાલુકા વહીવટી તંત્રના અધિકારીઓ સાથે સંકલન કરીને દબાણ દૂર કરવાની કાર્યવાહી હાથ ધરી હતી. સરકારી સર્વે નંબર 871, 872, 873, 945, 946 અને 947 પૈકીની જમીનમાં ખેતી માટે કરવામાં આવેલા દબાણો તંત્ર દ્વારા દૂર કરવામાં આવ્યા હતા. તંત્ર દ્વારા જણાવવામાં આવેલા દબાણકારોમાં હેમભા સુમરાજી ધલ, કેશુભા નવુભા સોઢા, નવુભા તેજમલજી ધલ, સામતજી તેજમલજી ધલ, ઉકાજી તેજમલજી ધલ, સુરુભા તેજમલજી ધલ, પનુભા તેજમલજી ધલ, ફતેસંગજી તેજમલજી ધલ, હરીભા જવણજી સોઢા, રામસંગજી ડુજાજી ધલ, ભરતસિંહ સતુભા ધલ, કરમજી ઉકાજી ધલ, નોધણજી ઉકાજી ધલ, ખાનજી બારજ અને નરેન્દ્રસિંહ પચાણ સોઢાનો સમાવેશ થાય છે. સરકારી ગૌચર જમીન પરના દબાણો દૂર થયા બાદ સંબંધિત જમીન સરકારના કબજામાં પરત લેવામાં આવી છે. સરહદી વિસ્તારને ધ્યાનમાં રાખીને કરવામાં આવેલી આ સંયુક્ત કાર્યવાહીને વહીવટી તંત્ર અને પોલીસની સંકલિત કામગીરી તરીકે જોવામાં આવી રહી છે.