જામનગર શહેરમાં પોલીસ કસ્ટડીમાંથી ખંડણીનો આરોપી ફરાર થવાની ઘટના સામે આવી હતી. ટ્રાફિકનો લાભ ઉઠાવીને હોમગાર્ડ જવાનની બાઈક પરથી આરોપી ભાગી ગયો હતો. જોકે, પોલીસે ત્વરિત કાર્યવાહી કરીને તેને ટૂંકા સમયમાં ફરી ઝડપી પાડ્યો છે. આ મામલે બેદરકારી બદલ એક મહિલા પોલીસ કર્મચારીને સસ્પેન્ડ કરવામાં આવ્યા છે. પ્રાપ્ત માહિતી અનુસાર, સિટી સી પોલીસ મથકમાં ખંડણીના ગુના હેઠળ નોંધાયેલા આરોપી મીત ઉર્ફે મિતેષ ઉર્ફે મીતલો બારીયાને એક હોમગાર્ડ જવાન બાઈક પર લઈ જઈ રહ્યા હતા. એમ.પી. શાહ કોલેજ અને સાત રસ્તા સર્કલ નજીક ભારે ટ્રાફિક જામનો લાભ ઉઠાવીને આરોપી ચાલુ બાઈકે નીચે ઉતરી ગયો હતો. તે અગાઉથી રાહ જોઈ રહેલા પોતાના મદદગારની બાઈક પર બેસીને રોંગ સાઈડમાં ફરાર થઈ ગયો હતો. આ ઘટના પૂર્વ આયોજિત હોવાની આશંકા છે. આ ઘટના બાદ પોલીસ બેડામાં દોડધામ મચી ગઈ હતી. સિટી બી પોલીસ સ્ટેશનના પી.આઈ. એન.બી. ચૌહાણ અને ઉચ્ચ અધિકારીઓના માર્ગદર્શન હેઠળ સમગ્ર શહેરમાં નાકાબંધી કરાઈ હતી. પોલીસે અલગ-અલગ ટીમો બનાવી તપાસના ચક્રો ગતિમાન કર્યા હતા અને રાત્રિના સમયે જ આરોપીને ફરીથી ઝડપી પાડ્યો હતો. આ ગંભીર બેદરકારી મામલે જિલ્લા પોલીસ વડા ડો. રવિ મોહન સૈનીએ કડક વલણ અપનાવ્યું છે. તેમણે આ મામલામાં જવાબદાર એક મહિલા પોલીસ કર્મચારીને તાત્કાલિક અસરથી સસ્પેન્ડ કરવાનો આદેશ આપ્યો છે.