નવસારી જિલ્લાના ગણદેવી તાલુકાના ઊંડાચ લુહાર ફળિયા ખાતે આયુષ મેગા સર્વરોગ નિદાન-સારવાર કેમ્પ યોજાયો હતો. આયુર્વેદ અને હોમિયોપેથી પદ્ધતિના પ્રચાર-પ્રસાર તથા લોકજાગૃતિ માટે તેનું આયોજન કરાયું હતું. જિલ્લા આયુર્વેદ અધિકારી ડો. કાજલબેન મઢીકરના માર્ગદર્શન હેઠળ આ કેમ્પ યોજાયો હતો. તેમાં આયુર્વેદ અને હોમિયોપેથી દ્વારા નિદાન-સારવાર, પ્રકૃતિ પરીક્ષણ, જીરિયાટ્રીક ઓપીડી, યોગ માર્ગદર્શન, દિનચર્યા-ઋતુચર્યા અંગે માર્ગદર્શન, ઔષધિ વિતરણ અને ઔષધીય વનસ્પતિનું પ્રદર્શન કરાયું હતું. પોષણ માસ અંતર્ગત સ્વસ્થ જીવનશૈલી માટે લોકજાગૃતિ રેલી પણ યોજાઈ હતી. કેમ્પમાં યોગ નિદર્શન સહિત વિવિધ આયુષ પ્રવૃત્તિઓ થઈ હતી. કુલ ૨૭૧ લોકોએ આ કેમ્પનો લાભ લીધો હતો. આયુર્વેદ શાખા, નવસારીએ ગ્રામજનોને આયુષ પદ્ધતિ અને સ્વસ્થ જીવનશૈલી અંગે માર્ગદર્શન આપ્યું હતું.