સંયુક્ત રાષ્ટ્ર વસ્તી કોષ (UNFPA) એ ગાઝામાં મહિલાઓ અને છોકરીઓ વિરુદ્ધ વધી રહેલી હિંસાને લઈને એક અહેવાલ જાહેર કર્યો છે. તેમાં જણાવાયું છે કે એક પિતાએ પોતાની 14 વર્ષની દીકરીના લગ્ન 2 કોથળા લોટના બદલામાં કરાવી દીધા. ગાઝામાં બળાત્કાર પીડિતાઓના લગ્ન આરોપીઓ સાથે કરાવવામાં આવ્યા હોવાના કિસ્સાઓ પણ સામે આવ્યા છે. અહેવાલ મુજબ, પરિવાર અને સમાજમાં બદનામીથી બચવા તથા ‘ઇજ્જત’ જાળવી રાખવાના નામે કેટલીક પીડિતાઓના લગ્ન આરોપીઓ અથવા કોઈ અન્ય વ્યક્તિ સાથે કરાવી દેવામાં આવ્યા. ગાઝામાં બાળ અને બળજબરીથી કરાવવામાં આવતા લગ્નના નોંધાયેલા કિસ્સાઓમાં 123%નો વધારો થયો છે. UNFPAએ આ માહિતી ગાઝામાં કાર્યરત 10 સંસ્થાઓ પાસેથી એકત્રિત કરી છે. આ ઉપરાંત, ગાઝા સિટી અને ખાન યુનિસના વિસ્થાપિત શિબિરોમાં રહેતી 230 મહિલાઓ સાથે વાતચીત કરવામાં આવી હતી. શાળામાં બળાત્કાર બાદ એ જ જગ્યાએ લગ્ન અને ઉજવણી ગાઝા સિટી અને ખાન યુનિસના વિસ્થાપન શિબિરોમાં રહેતી મહિલાઓએ બળાત્કારના અનેક કિસ્સાઓ વિશે જણાવ્યું. તેમના મુજબ, આવી ઘટનાઓ તંબુઓમાં, આશ્રયસ્થાન તરીકે ઉપયોગમાં લેવાતી શાળાઓમાં, ગલીઓમાં અને દરિયાકિનારે પણ બની હતી. જ્યાં આરોપી પીડિતાને ઓળખતો હતો, ત્યાં ઘટનાને છુપાવવાનો પ્રયાસ કરવામાં આવ્યો. કેટલાક કિસ્સાઓમાં પીડિતાના લગ્ન આરોપી અથવા અન્ય કોઈ વ્યક્તિ સાથે કરાવી દેવામાં આવ્યા. એક મહિલાએ જણાવ્યું, જ્યારે શાળામાં બળાત્કારનો મામલો સામે આવે છે, ત્યારે બીજા જ દિવસે એ જ શાળામાં લગ્ન અને ઉજવણી થાય છે. યુદ્ધ પહેલાં આવી ઘટનાઓ વિશે વિચારવું પણ મુશ્કેલ હતું. દિવ્યાંગ છોકરીઓ પર વધુ જોખમ રિપોર્ટમાં દિવ્યાંગ મહિલાઓ અને છોકરીઓને પણ વધુ જોખમમાં હોવાનું જણાવાયું છે. કેટલાક આરોપીઓ તેમની આ સ્થિતિનો ફાયદો ઉઠાવે છે. ગાઝા સિટીની એક મહિલાએ જણાવ્યું કે એક દિવ્યાંગ છોકરી 7 કલાક સુધી ગુમ રહી હતી. પાછી આવ્યા બાદ તે રડી રહી હતી, પરંતુ પરિવારને લાગ્યું કે તે ડરી ગઈ હતી. લગભગ બે મહિના બાદ જાણવા મળ્યું કે તે ગર્ભવતી હતી અને તેની સાથે બળાત્કાર થયો હતો. આરોપીનો પત્તો લાગી શક્યો નહોતો. એક અન્ય કેસમાં 20 વર્ષની એવી મહિલાનો ઉલ્લેખ છે, જેને વાતો સમજવામાં મુશ્કેલી પડતી હતી. મહિલાના જણાવ્યા અનુસાર, ઘણા યુવકોએ તેની છેડતી કરી અને તેમાંથી એકે તેની સાથે બળાત્કાર કર્યો. માતા-પિતાના મૃત્યુ બાદ 14-15 વર્ષની છોકરીઓનાં લગ્ન યુદ્ધમાં માતા-પિતાને ગુમાવી ચૂકેલી છોકરીઓ પણ નાની ઉંમરે લગ્નના જોખમમાં છે. ગાઝા સિટીની એક મહિલાએ જણાવ્યું કે તેના પરિવારની 14 અને 15 વર્ષની બે છોકરીઓનાં માતા-પિતા યુદ્ધમાં માર્યા ગયા હતા. ત્યાર બાદ તેમના કાકાઓએ બંનેનાં લગ્ન કરાવી દીધાં. મહિલાએ જણાવ્યું, કાકાઓ તેમની જવાબદારી અને ખર્ચ ઉઠાવવા માંગતા નહોતા. છોકરીઓનાં લગ્ન એવી ઉંમરે કરાવી દેવામાં આવ્યા, જ્યારે તેઓ એ પણ સમજતી નહોતી કે લગ્ન કે જિંદગી શું હોય છે.