ગોધરામાં ગણેશ વિસર્જન શાંતિપૂર્ણ માહોલમાં સંપન્ન થાય અને કાયદો વ્યવસ્થા જળવાઈ રહે તે માટે પોલીસ પ્રશાસન દ્વારા તૈયારીઓને આખરી ઓપ આપવામાં આવી રહ્યો છે. આ તૈયારીઓના ભાગરૂપે, ગોધરાના BAPS સ્વામિનારાયણ હોલ ખાતે એક મહત્વની બ્રિફિંગ બેઠક યોજાઈ હતી. આ બેઠકમાં પંચમહાલ, મહીસાગર અને દાહોદ જિલ્લાના પોલીસ અધિકારીઓ હાજર રહ્યા હતા. બેઠકમાં પંચમહાલ જિલ્લા પોલીસ વડા ડૉ. હરેશ દુધાત, મહીસાગર જિલ્લા પોલીસ વડા સફિન હસન અને દાહોદ જિલ્લા પોલીસ વડા સહિત મોટી સંખ્યામાં પોલીસ અધિકારીઓ હાજર રહ્યા હતા. ગણેશ વિસર્જન દરમિયાન કોઈ અનિચ્છનીય બનાવ ન બને, ટ્રાફિક વ્યવસ્થા જળવાઈ રહે અને શ્રદ્ધાળુઓ સુરક્ષિત રીતે વિસર્જન કરી શકે તે માટે જરૂરી માર્ગદર્શન આપવામાં આવ્યું હતું. આમાં પોલીસ બંદોબસ્ત, રૂટ વ્યવસ્થા અને કાયદો-વ્યવસ્થા જાળવવા પર ભાર મૂકવામાં આવ્યો હતો.