ગોધરામાં ભારત વિકાસ પરિષદ દ્વારા “રાષ્ટ્રીય સમૂહગાન સ્પર્ધા”નું આયોજન કરવામાં આવ્યું હતું. આ સ્પર્ધામાં દેશભક્તિ અને સંસ્કારોનો અનોખો સંગમ જોવા મળ્યો હતો. ભારત વિકાસ પરિષદ – ગોધરા શાખા દ્વારા ગોધરા સ્થિત બીઆરજીએફ ભવન હોલ ખાતે આ કાર્યક્રમ યોજાયો હતો. સંપર્ક, સહયોગ, સંસ્કાર, સેવા અને સમર્પણના ઉમદા હેતુ સાથે તેનું આયોજન કરાયું હતું. આ રાષ્ટ્રભક્તિના મહોત્સવમાં વિવિધ સ્પર્ધકોએ દેશભક્તિ અને રાષ્ટ્રભાવનાથી ભરપૂર સમૂહગાન રજૂ કર્યા હતા, જેણે ઉપસ્થિત સૌને મંત્રમુગ્ધ કર્યા હતા. કાર્યક્રમમાં પંચમહાલ જિલ્લા પંચાયતના પ્રમુખ નીરજ પટેલ, પંચમહાલ જિલ્લા પોલીસ અધિક્ષક ડૉ. હરેશ દુધાત, ગોધરા શ્રી સાર્વજનિક શિક્ષણ મંડળના પ્રમુખ ભૂપેશ શરદકુમાર શાહ સહિત વિવિધ ક્ષેત્રના આગેવાનો અને મોટી સંખ્યામાં લોકો હાજર રહ્યા હતા. રાષ્ટ્રીય સમૂહગાન સ્પર્ધાનો મુખ્ય ઉદ્દેશ્ય વિદ્યાર્થીઓ અને યુવાનોમાં દેશપ્રેમ, રાષ્ટ્રભાવના તેમજ ભારતીય સંસ્કૃતિ અને સંસ્કારો પ્રત્યે જાગૃતિ વધારવાનો હતો. સમગ્ર કાર્યક્રમ રાષ્ટ્રભક્તિ અને ઉત્સાહભર્યા વાતાવરણમાં સફળતાપૂર્વક સંપન્ન થયો હતો.