ગ્રીસની વાયુસેનાનું બે સીટવાળું F-4 ફેન્ટમ ફાઇટર જેટ શનિવારે એર શો દરમિયાન ક્રેશ થઈ ગયું. આ દુર્ઘટનામાં વિમાનમાં સવાર બંને પાયલટના મોત થયા. તે સમયે એથેન્સની ઉત્તરમાં આવેલા તાનાગ્રા એરફોર્સ બેઝ પર આયોજિત ‘એથેન્સ ફ્લાઈંગ વીક’ જોવા માટે હજારો લોકો હાજર હતા. વાયુસેનાનું ફ્લાઇટ ડેમોન્સ્ટ્રેશન શરૂ થયાના થોડી મિનિટો પછી વિમાને અચાનક ઊંચાઈ ગુમાવી દીધી. તે ઓછી ઊંચાઈએ કરતબ બતાવતી વખતે જમીન સાથે અથડાયું. ટક્કર પછી વિમાન બે ટુકડામાં તૂટી ગયું અને અલગ-અલગ જગ્યાએ આગ લાગી ગઈ. દુર્ઘટના પછી ઘટનાસ્થળેથી કાળા ધુમાડાનો મોટો ગુબાર ઊઠતો દેખાયો. ક્રેશ સાઇટ દર્શકોવાળા વિસ્તારથી થોડા અંતરે હતી, તેથી ત્યાં અફરાતફરી મચી ગઈ. જોકે, અધિકારીઓ મુજબ કોઈ દર્શકના ઘાયલ થવાના સમાચાર નથી. પ્લેન ક્રેશ સાથે જોડાયેલી 4 તસવીરો બંને પાઇલટોના મૃતદેહ મળ્યા શરૂઆતમાં અધિકારીઓને ખબર ન હતી કે બંને પાઇલટ સમયસર વિમાનમાંથી ઇજેક્ટ કરી શક્યા હતા કે નહીં. દુર્ઘટનાના તરત જ કોઈ પેરાશૂટ પણ દેખાયું ન હતું. બાદમાં બચાવ દળે ઘટનાસ્થળેથી બંને પાઇલટોના મૃતદેહ શોધી કાઢ્યા. પ્રારંભિક અહેવાલો અનુસાર, દુર્ઘટના પહેલા વિમાનમાંથી ધુમાડો નીકળતો દેખાયો હતો. પ્રત્યક્ષદર્શીઓએ જણાવ્યું કે ત્યારબાદ જેટ અચાનક ઊંચાઈ ગુમાવી અને ઝડપથી જમીન તરફ પડવા લાગ્યું. વિમાન પડ્યા બાદ ઘટનાસ્થળે લાગેલી આગ બુઝાવવા માટે મોટા પાયે બચાવ અભિયાન ચલાવવામાં આવ્યું. 85 અગ્નિશામકોને ઘટનાસ્થળે મોકલવામાં આવ્યા. તેમની સાથે 11 વિમાન અને હેલિકોપ્ટર પણ આગ બુઝાવવામાં કામે લગાડવામાં આવ્યા. આગ દર્શકોના વિસ્તારથી થોડા અંતરે લાગી હતી. તેમ છતાં, સાવચેતીના ભાગરૂપે એરબેઝની આસપાસના વિસ્તારને ખાલી કરાવવાનો આદેશ આપવામાં આવ્યો. દુર્ઘટના બાદ આયોજકોએ વીકએન્ડમાં યોજાનાર એર શોના બાકીના તમામ કાર્યક્રમો રદ કરી દીધા. વીડિયો ફૂટેજમાં વિમાન જમીન સાથે અથડાયા પછી ધુમાડાનો મોટો ગોટો ઉડતો દેખાય છે. તેના થોડા જ સમય પછી જોરદાર ધડાકો થયો અને વિમાન તૂટીને વિખેરાઈ ગયું. ગ્રીસના સંરક્ષણ મંત્રીએ દુઃખ વ્યક્ત કર્યું સાયપ્રસના સંરક્ષણ મંત્રી વાસિલિસ પાલ્માસે ગ્રીસના સંરક્ષણ મંત્રી નિકોસ ડેન્ડિયાસ સાથે ફોન પર વાત કરી અને બંને પાઇલટોના મૃત્યુ પર સંવેદના વ્યક્ત કરી. પાલ્માસે સોશિયલ મીડિયા પર લખ્યું કે તેમને “તાનાગ્રા એરબેઝ પર એર શો દરમિયાન થયેલા દુઃખદ અકસ્માતમાં ગ્રીસની વાયુસેનાના બે અધિકારીઓના મૃત્યુના સમાચાર અત્યંત દુઃખ સાથે મળ્યા.” આ દુર્ઘટના બે દિવસીય એથેન્સ ફ્લાઇંગ વીક ઇન્ટરનેશનલ એર શો દરમિયાન બની હતી. તેમાં યુરોપ અને એશિયાના ઘણા દેશોની એરિયલ ટીમોએ ભાગ લીધો હતો. F-4 ફેન્ટમના ક્રેશ થવાનું કારણ હજુ સામે આવ્યું નથી.