દુનિયાભરમાં ઇન્ટરનેટનો 99% ડેટા સમુદ્રની નીચે પાથરવામાં આવેલી કેબલો દ્વારા ચાલે છે. છેલ્લા દસ વર્ષ સુધી ચીનની નજીક આવેલા દક્ષિણ ચીન સાગર અને લાલ સાગર તેના મુખ્ય માર્ગો હતા. પરંતુ યુદ્ધ, તણાવના કારણે હવે કંપનીઓ આ માર્ગોથી બચી રહી છે. નવા ઇન્ટરનેટ કેબલો સીધા હિન્દ મહાસાગરમાંથી પાથરવામાં આવી રહ્યા છે, જેથી AI જેવી સેવાઓ માટે વિક્ષેપ વિના ઝડપી ઇન્ટરનેટ મળી શકે. આ મોટા બદલાવથી ભારતને મોટો ફાયદો થઈ રહ્યો છે અને મુંબઈ બાદ હવે ચેન્નાઈ પણ દુનિયાનું નવું મોટું ઇન્ટરનેટ હબ બની રહ્યું છે. ભારત સાઉથ એશિયામાં સુરક્ષિત ‘ડિજિટલ હબ’ તરીકે ઉભરી રહ્યું છે ભારત દક્ષિણ એશિયામાં સુરક્ષિત ‘ડિજિટલ હબ’ તરીકે ઊભરી રહ્યું છે. લક્ષદ્વીપ સમુદ્રનું કેબલ કોરિડોર તરીકેનું મહત્વ વધવાથી હિન્દ મહાસાગરમાં ભારતને નવી વ્યૂહાત્મક વધારાની તક મળશે. સાથે જ, વૈશ્વિક ટેક કંપનીઓના ભારે રોકાણ અને વધુ સારી ડિજિટલ કનેક્ટિવિટીની તકો પણ ઝડપથી વધશે. કોઈ દેશની અર્થવ્યવસ્થાને અપંગ બનાવી શકે સબમરીન કેબલ્સ વિશ્વના 99% ઇન્ટરનેટ ટ્રાફિકને સંભાળે છે, જેના વિના વૈશ્વિક બેન્કિંગ, સંચાર અને અર્થવ્યવસ્થા સંપૂર્ણપણે ઠપ થઈ જશે. આવનારા સમયમાં AI, ક્લાઉડ ડેટા અને સુપરકમ્પ્યુટિંગની ભારે જરૂરિયાતોને કારણે તેમનું વ્યૂહાત્મક મહત્વ અનેકગણું વધશે. આ સ્થિતિ એક ‘અદૃશ્ય યુદ્ધ’ જેવી જ છે, જ્યાં કોઈ દેશના કેબલ કાપી નાખવાથી મિસાઇલ ચલાવ્યા વિના તેની અર્થવ્યવસ્થાને અપંગ બનાવી શકાય છે. સબમરીન કેબલ કેવી રીતે કામ કરે છે? ફાઇબર ઓપ્ટિક ટેક્નોલોજી: સબમરીન કેબલ વીજળીના તાર જેવો હોતો નથી. તેમાં અત્યંત પાતળા ગ્લાસ ફાઇબર હોય છે, જેના દ્વારા ડેટા લાઇટ પલ્સના રૂપમાં હજારો કિલોમીટર સુધી જાય છે. રિપીટર: લાંબા અંતરમાં સિગ્નલ નબળો ન પડે તે માટે કેબલમાં જગ્યાએ જગ્યાએ રિપીટર લગાવવામાં આવે છે. કેબલની અંદર રહેલા ધાતુના સ્તર દ્વારા તેમને વીજળી મળે છે. સુરક્ષા: કેબલને સમુદ્રના દબાણ અને નુકસાનથી બચાવવા માટે તેને અનેક સુરક્ષાત્મક સ્તરોથી ઢાંકવામાં આવે છે. કિનારા નજીક તેને વધુ મજબૂત બનાવવામાં આવે છે અને ઘણી જગ્યાએ સમુદ્રના તળિયે દાટી દેવામાં આવે છે. સબમરીન કેબલ કપાઈ જાય ત્યારે શું થાય છે? ઇન્ટરનેટ સંપૂર્ણપણે બંધ થતું નથી. કેબલ કપાઈ જાય ત્યારે ડેટા અન્ય કેબલો દ્વારા મોકલવામાં આવે છે. તેને નેટવર્ક રિડન્ડન્સી કહેવામાં આવે છે. કંપનીઓ ડેટા ટ્રાફિકને ઘણી કેબલોમાં વહેંચીને રાખે છે, જેથી એક કેબલ ખરાબ થાય ત્યારે બીજી કેબલ કામ કરી શકે. જ્યાં કેબલો ઓછા હોય છે, ત્યાં ઇન્ટરનેટ ધીમું થઈ શકે છે અથવા કેટલીક સેવાઓને અસર થઈ શકે છે. સેટેલાઇટ કનેક્ટિવિટી પણ જરૂરી સેવાઓ માટે બેકઅપ તરીકે કામ કરી શકે છે. પરંતુ જો કોઈ વિસ્તારમાં માત્ર એક જ કેબલ હોય અને તે કપાઈ જાય, તો ત્યાં ઇન્ટરનેટ સંપૂર્ણપણે બંધ થઈ શકે છે.