સ્વતંત્રતા પર્વ નિમિત્તે જમાપુર ગામે દૂધ ઉત્પાદક સહકારી મંડળીના પટાંગણમાં ધ્વજવંદન કાર્યક્રમ યોજાયો હતો. આ રાષ્ટ્રીય પર્વની ઉજવણી દેશભક્તિના માહોલમાં કરવામાં આવી હતી. કાર્યક્રમની શરૂઆતમાં મંડળીના પ્રમુખ અમરસિંહભાઈ ગામીતના હસ્તે રાષ્ટ્રધ્વજ ફરકાવવામાં આવ્યો હતો. ઉપસ્થિત તમામ લોકોએ ધ્વજને સલામી આપી રાષ્ટ્રગીતનું ગાન કર્યું હતું. આ પ્રસંગે ગામના માજી સરપંચ દિલીપભાઈ ગામીતે પ્રાસંગિક સંબોધન કર્યું હતું. તેમણે રાષ્ટ્રીય પર્વનું મહત્ત્વ સમજાવ્યું અને ગ્રામજનોને દેશપ્રેમ તથા સહકારની ભાવના જાળવી રાખવા પ્રેરણા આપી હતી. આ રાષ્ટ્રીય મહોત્સવમાં જમાપુર ગામના સભાસદો, દૂધ મંડળીના હોદ્દેદારો, કર્મચારીઓ, સ્થાનિક શાળાના શિક્ષકો અને મોટી સંખ્યામાં બાળકોએ ઉપસ્થિતિ નોંધાવી હતી. કાર્યક્રમના અંતે મંડળી દ્વારા ઉપસ્થિત તમામ ગ્રામજનો અને બાળકોને મિઠાઈનું વિતરણ કરવામાં આવ્યું હતું. સમગ્ર કાર્યક્રમ દેશભક્તિના માહોલ વચ્ચે સફળતાપૂર્વક સંપન્ન થયો હતો.