વિદેશ મંત્રી એસ. જયશંકરે રવિવારે કહ્યું કે જ્યારે સમગ્ર દુનિયા પાકિસ્તાનની સાથે ઊભી હતી, ત્યારે રશિયાએ ભારતનો સાથ આપ્યો હતો. દિલ્હીમાં મ્યુનિક સિક્યોરિટી કોન્ફરન્સમાં જયશંકરે કહ્યું કે, ભારત-રશિયા સંબંધો લાંબા સમયથી સારા રહ્યા છે. નવી દિલ્હી માટે મોસ્કો સાથેના સંબંધો માત્ર આજની પરિસ્થિતિથી નક્કી થતા નથી. રશિયાએ છેલ્લા 70 વર્ષમાં કાશ્મીર સહિત 4 મહત્વપૂર્ણ મુદ્દાઓ પર ભારતનું સમર્થન કર્યું છે. રશિયાએ UNમાં ભારત માટે વીટોનો ઉપયોગ કર્યો હતો 20 ફેબ્રુઆરી 1957ના રોજ ઓસ્ટ્રેલિયા, ક્યુબા, બ્રિટન અને અમેરિકાએ કાશ્મીરને લઈને સંયુક્ત રાષ્ટ્ર સુરક્ષા પરિષદ (UNSC)માં એક ઠરાવ રજૂ કર્યો હતો. તેમાં કાશ્મીરમાં અસ્થાયી સંયુક્ત રાષ્ટ્ર દળ મોકલવાના વિચારને આગળ વધારવાની વાત હતી. ઠરાવને 9 દેશોનું સમર્થન મળ્યું, પરંતુ રશિયા (તે સમયે સોવિયેત સંઘ)એ વીટો કરી દીધો, તેથી ઠરાવ પસાર થયો નહીં. તેના એક દિવસ પછી, 21 ફેબ્રુઆરી 1957ના રોજ બીજો ઠરાવ રજૂ કરવામાં આવ્યો. તેમાં UNSCના અધ્યક્ષને ભારત અને પાકિસ્તાન સાથે વાતચીત કરીને ઉકેલના રસ્તા શોધવા માટે મોકલવાની વાત હતી. આ વખતે સોવિયેત સંઘે વીટો કર્યો નહીં, પરંતુ મતદાનથી દૂર રહ્યું અને ઠરાવ પસાર થયો. 1971માં અમેરિકાએ પાકિસ્તાનનું સમર્થન કર્યું હતું 1965, ભારત-પાકિસ્તાન યુદ્ધ – ચીને પાકિસ્તાનનું સમર્થન કર્યું. ભારત પર દબાણ વધારવા માટે તેણે પોતાની સરહદ પર સૈનિકો તહેનાત કર્યા. ઈરાન અને તુર્કિયેએ પણ પાકિસ્તાનનું સમર્થન કર્યું. ઈરાને તેને શસ્ત્રો અને ઈંધણ પણ આપ્યાં. 1971, બાંગ્લાદેશ યુદ્ધ – અમેરિકા પાકિસ્તાનના સમર્થનમાં હતું. તેણે પોતાનું યુદ્ધજહાજ બંગાળની ખાડી તરફ મોકલ્યું હતું. ચીન પણ પાકિસ્તાનની સાથે ઊભું હતું. 1971માં ઈરાનનું સમર્થન -ઈરાને પણ પાકિસ્તાનની મદદ કરી હતી. તેણે પાકિસ્તાન માટે હથિયારો એકત્ર કરવામાં મદદ કરી અને લશ્કરી સામાન ઉપલબ્ધ કરાવ્યો. એક અઠવાડિયામાં જયશંકરે બીજી વાર અમેરિકા પર કટાક્ષ કર્યો જયશંકરે રવિવારે અમેરિકા અંગે પણ કટાક્ષ કરતાં કહ્યું કે આજની દુનિયામાં બે મોટા ફેરફારો જોવા મળી રહ્યા છે- તેમના મતે, પોતાની નીતિઓને કારણે અમેરિકા દુનિયામાં અલગ પડી ગયું છે. બીજી તરફ, ચીનનો વધતો પ્રભાવ દેશો વચ્ચેની સ્પર્ધા વધારી રહ્યો છે. હવે અન્ય દેશો પણ પોતાના શક્તિ અને પ્રભાવનો ઉપયોગ ફાયદા માટે કરી રહ્યા છે. 5 દિવસ પહેલાં કહ્યું હતું- અમેરિકા ભારતની ચિંતા સમજતું નથી 29 સપ્ટેમ્બરે ન્યૂયોર્કની એશિયા સોસાયટી પોલિસી ઇન્સ્ટિટ્યૂટમાં જયશંકરે અમેરિકા વિશે નિવેદન આપ્યું હતું. તે કાર્યક્રમમાં ભારત-અમેરિકા સંબંધો અંગે પૂછાયેલા પ્રશ્નના જવાબમાં જયશંકરે કહ્યું હતું કે ભારતની સૌથી મોટી ચિંતાઓમાંની એક પાકિસ્તાનથી આવતો આતંકવાદ છે. જો અમેરિકા આ ચિંતાને સંપૂર્ણપણે સમજતું નથી અથવા તેની ગંભીરતાનો અહેસાસ કરતું નથી, તો તેની અસર ભારત-અમેરિકા સંબંધો પર પડે છે. જયશંકરે કહ્યું- ભારતે રશિયા-યુક્રેન વચ્ચેનું યુદ્ધ રોકવા અંગે વાતચીત કરી જયશંકરે યુક્રેન યુદ્ધને લઈને ભારતનું જૂનું વલણ પુનરાવર્તિત કર્યું. તેમણે કહ્યું કે યુદ્ધ સમાપ્ત કરવા માટે વાતચીત, કૂટનીતિ અને સમજૂતીનો માર્ગ અપનાવવો જરૂરી છે. વડાપ્રધાન નરેન્દ્ર મોદી પણ ઘણી વાર આ જ વાત કહી ચૂક્યા છે. તેમણે 2022માં રશિયાના રાષ્ટ્રપતિ પુતિનને કહ્યું હતું કે આજનો સમય યુદ્ધનો નથી. જયશંકરે કહ્યું કે ભારત હવે માત્ર શાંતિની અપીલ કરવા પૂરતું મર્યાદિત નથી. તાજેતરના મહિનાઓમાં ભારતે રશિયા અને યુક્રેન બંને સાથે વાતચીત કરી છે. આ વાતચીતમાં બ્લેક સીમાં જહાજોની સુરક્ષિત અવરજવર, અનાજ અને ઊર્જાની નિકાસ તેમજ મહત્વપૂર્ણ માળખાગત સુવિધાઓ પરના હુમલા રોકવા જેવા મુદ્દાઓ સામેલ છે.