જામજોધપુર તાલુકામાં ખાણ-ખનીજ વિભાગે ગેરકાયદે ખનીજ વહન સામે કાર્યવાહી કરી છે. શેઠવડાળા-સડોદર રોડ પર ચેકિંગ દરમિયાન બ્લેકટ્રેપ ખનીજ લઈ જતા 4 ડમ્પર ઝડપાયા હતા. આ તપાસ જામનગર જિલ્લા ભૂસ્તરશાસ્ત્રીના માર્ગદર્શન હેઠળ કરવામાં આવી હતી. ઝડપાયેલા 4 ડમ્પરમાંથી 2 ડમ્પર પાસે ખનીજ વહન માટે કોઈ માન્ય પુરાવા નહોતા. જ્યારે અન્ય 2 ડમ્પર નિયત માત્રા કરતાં વધુ ખનીજ (ઓવરલોડ) લઈ જતા હતા. ખનીજ વિભાગની ટીમે ચારેય વાહનો અને ખનીજનો જથ્થો મળીને આશરે 1 કરોડ રૂપિયાનો મુદ્દામાલ જપ્ત કર્યો હતો. જપ્ત કરાયેલા વાહનોને સુરક્ષા માટે ક્રિષ્ના સ્ટોન ક્રશર અને સ્વાતી સ્ટોન ક્રશર ખાતે સોંપવામાં આવ્યા છે. આ કાર્યવાહીમાં ખાણ-ખનીજ વિભાગની ટીમના સભ્યો નૈતિકભાઈ, આનંદભાઈ અને નિખીલભાઈ જોડાયા હતા. ખનીજ વિભાગ દ્વારા આ મામલે કાયદેસરના દંડ અને નિયમો અનુસાર આગળની કાર્યવાહી હાથ ધરવામાં આવી છે.