નેપાળમાં સતત પડી રહેલા મુશળધાર વરસાદ, વિનાશક પૂર અને ભેખડો ધસી પડવાની ભયાનક હોનારત વચ્ચે કૈલાશ માનસરોવર અને મુક્તિનાથની યાત્રાએ ગયેલું ગુજરાતના 34 યાત્રિકોનું ગ્રૂપ સહીસલામત રીતે વતન પરત ફર્યું છે. નેપાળ-ચીન સરહદ નજીકના તિમુરે બોર્ડર વિસ્તારમાં કુદરતી પ્રકોપ ત્રાટક્યો તેના ગણતરીના કલાકો પહેલાં જ આ તમામ યાત્રિકો ત્યાંથી રવાના થઈ ચૂક્યા હતા. સુરક્ષિત પરત ફર્યા બાદ જ્યારે યાત્રાળુઓએ પોતે જ્યાં થોડા સમય પહેલાં સેલ્ફી લીધી હતી તે જ ઇમિગ્રેશન બિલ્ડિંગ પત્તાના મહેલની જેમ પૂરના ધસમસતા પ્રવાહમાં ધરાશાયી થઈને તણાઈ જવાનો વીડિયો જોયો, ત્યારે સૌના કાળજા કંપી ઊઠ્યા હતા. સમગ્ર પ્રવાસ દરમિયાન સાથે રહીને તમામ સુવિધાઓ સાચવનારા સ્થાનિક નેપાળી ગાઇડ સહિતના સહાયકોના મોતના સમાચાર મળતાં તમામ યાત્રિકોએ ઊંડો આઘાત વ્યક્ત કર્યો છે. સમયસર નીકળી જતાં મોટો ચમત્કાર
વડોદરાના યાત્રિક તુષારભાઈ ભટ્ટે સમગ્ર ઘટનાક્રમ વર્ણવતાં જણાવ્યું હતું કે તેઓ કુલ 34 લોકોના ગ્રૂપ સાથે કૈલાશ માનસરોવર યાત્રાએ ગયા હતા અને તે પૈકી 4 લોકો મુક્તિનાથ દર્શન માટે ગયા હતા. તેમણે 12 અને 19 ઓગસ્ટે નેપાળ-ચીન બોર્ડર ક્રોસ કરી હતી અને 25 ઓગસ્ટે રાત્રે કાઠમંડુ પહોંચ્યા બાદ 26 ઓગસ્ટે સવારે 8:00 વાગ્યે ભારત પરત આવવા રવાના થયા હતા. ચાઇનીઝ સમય મુજબ સવારે 10:30 થી 11:00 વાગ્યાની આસપાસ જ્યારે તિમુરે પોસ્ટ પર જળપ્રલય ત્રાટક્યો, ત્યારે તેઓ તે વિસ્તાર વટાવી ચૂક્યા હતા. યાત્રિકો ગભરાઈ ન જાય તે માટે ટૂર ઓપરેટરે તેમને તાત્કાલિક માહિતી આપી નહોતી, પરંતુ દિલ્હી પહોંચ્યા બાદ સમાચાર જોઈને તેઓ સ્તબ્ધ થઈ ગયા હતા. જે ઇમિગ્રેશન પોસ્ટ પર રોજના 300 થી 400 મુસાફરો અને સ્થાનિક સ્ટાફની અવરજવર રહેતી હતી તે આખો ધમધમતો વિસ્તાર ક્ષણભરમાં કાટમાળમાં ફેરવાઈ ગયો હતો. દોઢ ફૂટ મોટો પથ્થર પગ પાસેથી પસાર થયો
વડોદરાના અન્ય મહિલા યાત્રિક સુધાબેન ગોસ્વામીએ પોતાની કંપારી છૂટી જાય તેવી આપવીતી વર્ણવતાં જણાવ્યું હતું કે તિમુર પહોંચવાના રસ્તે એક બાજુ ઊંડી ખીણમાં ધસમસતી નદી વહી રહી હતી અને બીજી તરફ પહાડ પરથી સતત પથ્થરો નીચે પડી રહ્યા હતા. રસ્તો અત્યંત સાંકડો હોવાથી વાહનો અટકી જતાં કાદવ-કીચડ વચ્ચે ચાલીને આગળ વધવું પડ્યું હતું. તે દરમિયાન અચાનક ઉપરથી દોઢ ફૂટ મોટો પથ્થર ધસી આવ્યો હતો, જે તેમના પગને એકદમ સ્પર્શીને નીચે નદીમાં ખાબક્યો હતો. ઈશ્વરીય કૃપાથી જ તેમનો જીવ બચ્યો હતો. અમદાવાદ આવીને જ્યારે ટીવી પર બ્રિજ અને ઇમારતો તૂટવાના દ્રશ્યો જોયા ત્યારે તેઓ સંપૂર્ણપણે હચમચી ગયા હતા અને તે ભયાનક દ્રશ્યો આજે પણ તેમની આંખો સામેથી હટતા નથી. સેલ્ફી લીધી એ જ ઇમારત ધરાશાયી થઈ
યાત્રામાંથી પરત આવેલા પરીતાબેન શુક્લએ ભારે હૈયે જણાવ્યું હતું કે તેઓએ જે બિલ્ડિંગ પાસે ઊભા રહીને યાદગાર તસવીરો અને સેલ્ફી લીધી હતી, તે જ ઇમારત પૂરના પ્રચંડ પ્રવાહમાં ધરાશાયી થઈ ગઈ હતી. પહાડ અને નદી વચ્ચે ઘેરાયેલા લોકોને બચવા માટે ભાગવાની કોઈ જગ્યા જ મળી નહોતી. આ સમગ્ર મુશ્કેલ યાત્રા દરમિયાન પરિવારના સભ્યની જેમ ખડેપગે સેવા કરનારા અને ભાષાની અગવડતા વચ્ચે નાની-મોટી વ્યવસ્થાઓ સંભાળનારા સ્નેહી નેપાળી ગાઇડ આ હોનારતનો ભોગ બની દુનિયા છોડી ગયા તે જાણીને યાત્રાળુઓ અત્યંત દુઃખી અને શોકગ્રસ્ત થઈ ગયા છે. તમામ યાત્રિકોએ દિવંગતોના આત્માની શાંતિ માટે પ્રાર્થના વ્યક્ત કરી છે