અમેરિકી રાષ્ટ્રપતિ ડોનાલ્ડ ટ્રમ્પે ગુરુવારે વ્હાઇટ હાઉસમાં આયોજિત ‘સાયન્સ: અ ન્યૂ ગોલ્ડન એજ સમિટ’માં ઇલોન મસ્કને નેશનલ મેડલ ઑફ સાયન્સથી સન્માનિત કર્યા. ટ્રમ્પે અવકાશ સંશોધન, ટેક્નોલોજી અને ઇનોવેશનમાં મસ્કના યોગદાનની પ્રશંસા કરતાં તેમને ‘રાષ્ટ્રીય ધરોહર’ અને ‘આધુનિક યુગના થોમસ એડિસન’ ગણાવ્યા. એવોર્ડ આપતા પહેલાં ટ્રમ્પે મસ્કને ઉદ્યોગજગતના દિગ્ગજ, શાનદાર એન્જિનિયર અને અત્યાર સુધીના સૌથી મહાન ટેક્નોલોજી ફાઉન્ડર્સમાંના એક ગણાવ્યા. તેમણે કહ્યું કે મસ્કની પ્રતિભા અને દૃઢ સંકલ્પે વિજ્ઞાનકથાને વાસ્તવિકતામાં બદલી નાખી છે. ટ્રમ્પે ટેસ્લામાં મસ્કની ભૂમિકાની પ્રશંસા કરી ટ્રમ્પે ટેસ્લાની સ્થાપનામાં મસ્કની ભૂમિકાની પણ પ્રશંસા કરી. તેમણે ટેસ્લાને 75 વર્ષથી વધુ સમયગાળામાં સફળ થનારી પ્રથમ નવી કાર ઉત્પાદક કંપની ગણાવી અને કહ્યું કે કંપનીએ ઇલેક્ટ્રિક કારો અને સેલ્ફ-ડ્રાઇવિંગ ટેક્નોલોજીને વ્યાવસાયિક રીતે સફળ બનાવી છે. ટ્રમ્પે તેમના કાકા ડૉ. જૉન ટ્રમ્પનો પણ ઉલ્લેખ કર્યો, જેમને અમેરિકન સરકારે આવિષ્કારક નિકોલા ટેસ્લાના કાર્યનું મૂલ્યાંકન કરવા માટે નિયુક્ત કર્યા હતા. તેમણે મસ્કના ન્યુરાલિંક અને સુપરઇન્ટેલિજન્સ સાથે જોડાયેલા કાર્યની પણ પ્રશંસા કરી. ટ્રમ્પે કહ્યું કે મસ્ક એવા લોકોની દૃષ્ટિ, બોલવાની અને ચાલવાની ક્ષમતા પુનઃસ્થાપિત કરવા પર કામ કરી રહ્યા છે, જેમણે આ ક્ષમતાઓ ગુમાવી દીધી છે. નેશનલ મેડલ ઑફ સાયન્સની સ્થાપના 1959માં થઈ હતી નેશનલ મેડલ ઑફ સાયન્સથી ગૂગલના સહ-સ્થાપક સર્ગેઈ બ્રિન, એનવિડિયાના સીઈઓ જેન્સન હુઆંગ અને એએમડીના સીઈઓ લિસા સુને પણ સન્માનિત કરવામાં આવ્યા. બીજી તરફ, ડેલ ટેક્નોલોજીસના સીઈઓ માઇકલ ડેલ અને માઇક્રોસોફ્ટના સીઈઓ સત્ય નડેલાને નેશનલ મેડલ ઑફ ટેક્નોલોજી એન્ડ ઇનોવેશન એનાયત કરવામાં આવ્યો. ટ્રમ્પના બંને કાર્યકાળમાં આ પહેલીવાર હતું, જ્યારે તેમણે નેશનલ મેડલ ઑફ સાયન્સ અને નેશનલ મેડલ ઑફ ટેક્નોલોજી એન્ડ ઇનોવેશન એનાયત કર્યા.