વોશિંગ્ટનમાં 18 સપ્ટેમ્બરે રાષ્ટ્રપતિ ડોનાલ્ડ ટ્રમ્પે CNN, MSNOW અને પોલિટિકોને વ્હાઇટ હાઉસમાંથી પ્રતિબંધિત કરવાની જાહેરાત કરી. ટ્રમ્પે શુક્રવારે જણાવ્યું કે આ સંસ્થાઓના સતત ફેક ન્યૂઝ કવરેજને કારણે આ પ્રતિબંધ મૂકવામાં આવ્યો છે. તેમણે આગળ પણ અન્ય મીડિયા સંસ્થાઓ પર આવા પ્રતિબંધો મૂકવાની ધમકી આપી. ટ્રમ્પે પોતાની સોશિયલ મીડિયા સાઇટ પર લખ્યું કે આ પ્રતિબંધ તાત્કાલિક અસરથી લાગુ થશે. તેમણે આ સંસ્થાઓના રિપોર્ટિંગને “FAKE NEWS” ગણાવ્યું. આ પહેલાં ટ્રમ્પે ફેબ્રુઆરી 2025માં એસોસિએટેડ પ્રેસ (AP)ના પત્રકારો પર પણ આવો જ પ્રતિબંધ મૂક્યો હતો. તે સમયે ટ્રમ્પે APના પત્રકારોને ઓવલ ઓફિસ, એર ફોર્સ વન અને અન્ય કાર્યક્રમોમાં જવા પર રોક લગાવી હતી. આ કાર્યવાહી APએ ગલ્ફ ઓફ મેક્સિકોનું નામ બદલવાના તેમના નિર્ણયનું સમર્થન ન કર્યા બાદ કરવામાં આવી હતી. ત્રણેય સંસ્થાઓ ટ્રમ્પના નિર્ણયો પર સવાલ ઉઠાવતી રહી છે CNN- 24 કલાક ચાલતી ટીવી ન્યૂઝ ચેનલ અને ડિજિટલ વેબસાઇટ. અમેરિકન રાજકારણના મોટા સમાચાર અને ફેક્ટ-ચેકિંગ કરે છે. ટ્રમ્પના નિવેદનો અને નીતિઓ પર સતત તીખા સવાલો ઉઠાવતી રહી છે. MS NOW- કેબલ ટીવી ન્યૂઝ ચેનલ અને ડિજિટલ મીડિયા. લેફ્ટ-ઓફ-સેન્ટર રાજકીય ચર્ચાઓ અને ઓપિનિયન શો પર ધ્યાન કેન્દ્રિત કરે છે. ટ્રમ્પ પ્રશાસન અને તેમની નીતિઓનો સૌથી મુખર ટીકાકાર ચેનલ માનવામાં આવે છે. પોલિટિકો- પ્રમુખ ડિજિટલ ન્યૂઝ વેબસાઇટ અને રાજકીય અખબાર. વ્હાઇટ હાઉસ અને અમેરિકી સંસદના આંતરિક સમાચારો તથા નીતિઓનું રિપોર્ટિંગ કરે છે. ટ્રમ્પ પ્રશાસનના આંતરિક નિર્ણયો, વિવાદો અને વ્યૂહરચનાઓનું ઝીણવટભર્યું વિશ્લેષણ કરતું આવ્યું છે. ટ્રમ્પ પક્ષપાતનો આરોપ લગાવતા રહ્યા છે વર્ષ 2016થી જ ટ્રમ્પ CNNના સમાચારોને સતત “ફેક ન્યૂઝ” કહેતા રહ્યા છે અને તેમના કાર્યકાળ દરમિયાન અગાઉ પણ આ ચેનલના પત્રકારોના વ્હાઇટ હાઉસ પાસ રોકવામાં આવ્યા હતા. આ ઉપરાંત તેમણે ‘ન્યૂયોર્ક ટાઇમ્સ’ અને ‘વૉલ સ્ટ્રીટ જર્નલ’ જેવા મોટા અને પ્રતિષ્ઠિત અખબારો પર પણ પોતાની વિરુદ્ધ પક્ષપાત કરવાનો આરોપ લગાવ્યો અને તેમના પર માનહાનિના કેસ પણ દાખલ કરાવ્યા. ટ્રમ્પે આ તમામ સંસ્થાઓના અહેવાલો પર ખુલ્લેઆમ સવાલો ઉઠાવ્યા અને તેમના પર જાણીજોઈને ખોટા ઇરાદાથી સમાચાર ચલાવીને તેમને નિશાન બનાવવાનો આરોપ મૂક્યો. APએ દાખલ કર્યો કેસ APએ આ મામલે કેસ કર્યો હતો. આ મામલો હજુ ચાલુ છે. ટ્રમ્પ લાંબા સમયથી એવા મીડિયા કવરેજ સામે નારાજગી વ્યક્ત કરતા આવ્યા છે, જેને તેઓ પોતાના વિરુદ્ધ માને છે. મીડિયા સંસ્થાઓ સામે કેસ કરવા અને પત્રકારો પર વ્યક્તિગત રીતે હુમલો કરવાનો તેમનો જૂનો રેકોર્ડ છે. તેઓ પત્રકારોને સામસામે અથવા સોશિયલ મીડિયા દ્વારા પણ નિશાન બનાવતા રહ્યા છે. બીજી વખત રાષ્ટ્રપતિ બન્યા બાદથી ટ્રમ્પે ન્યૂયોર્ક ટાઇમ્સ, વૉલ સ્ટ્રીટ જર્નલ, BBC અને અન્ય મીડિયા સંસ્થાઓ વિરુદ્ધ કાનૂની કાર્યવાહી કરી છે. ટ્રમ્પનો નિર્ણય ગેરબંધારણીયઃ રિપોર્ટર્સ કમિટી ફોર ફ્રીડમ ઓફ ધ પ્રેસ પ્રેસ સ્વતંત્રતા માટે કામ કરતી વિવિધ સંસ્થાઓ અને નેતાઓએ ટ્રમ્પના આ વલણની સખત શબ્દોમાં ટીકા કરી છે. ‘રિપોર્ટર્સ કમિટી ફોર ફ્રીડમ ઓફ ધ પ્રેસ’ ના પ્રમુખ બ્રુસ ડી. બ્રાઉને આ નિર્ણયને તદ્દન ગેરબંધારણીય ગણાવ્યો છે. જ્યારે અમેરિકી સેનેટના નેતા ચક શુમરે સોશિયલ મીડિયા પર પ્રતિક્રિયા આપતા જણાવ્યું કે, “ડોનાલ્ડ ટ્રમ્પ બરાબર એ જ કરી રહ્યા છે જે ઇતિહાસમાં સરમુખત્યારો કરતા આવ્યા છે. આ એક લોકશાહી દેશ છે અને અહીં સત્યને દબાવી શકાશે નહીં.”