US રાષ્ટ્રપતિ ટ્રમ્પે 10 નવેમ્બરે Nvidiaના CEO જેન્સન હુઆંગને ફોન કર્યો હતો. તેમણે હુઆંગને નોકરી બચાવવા માટે લડત ચાલુ રાખવા કહ્યું હતું. આ મામલાથી સંકળાયેલા બે લોકોએ આ માહિતી આપી છે. આ પહેલી વાર નહોતું જ્યારે ટ્રમ્પે હુઆંગનો બચાવ કર્યો હોય. હુઆંગ તેમના નજીકના બની ગયા હતા. અમેરિકન ગુપ્તચર એજન્સીઓને જાણ થઈ ચૂકી હતી કે હુઆંગના એક એવી મહિલા સાથે સંબંધો છે, જેના પર ચીની જાસૂસ હોવાની શંકા છે. તેમ છતાં ટ્રમ્પ અંતિમ સમય સુધી તેમનો સાથ આપતા રહ્યા. ખરેખર, ટ્રમ્પને ડર હતો કે હુઆંગના પદ છોડવાથી Nvidia બરબાદ થઈ શકે છે. તેમ છતાં હુઆંગે 12 નવેમ્બરે રાજીનામું આપવું પડ્યું. ટ્રમ્પને હુઆંગના અફેર વિશે 2 વખત જાણકારી આપવામાં આવી Nvidiaના ચીફનું ચીની મહિલા એલિસ હુઆંગ સાથે અફેર છે, તેની જાણકારી ટ્રમ્પને ઓછામાં ઓછા બે વખત આપવામાં આવી હતી. અમેરિકી ગુપ્તચર એજન્સીઓનું માનવું હતું કે ચીનના ગુપ્તચર મંત્રાલયે તેને પોતાના માટે કામ કરવા તૈયાર કરી હતી. ટ્રમ્પને આ વિશે પહેલીવાર ગયા વર્ષના અંતમાં જણાવવામાં આવ્યું હતું. બીજી વખત જૂનમાં ચેતવણી આપવામાં આવી હતી. પરંતુ ટ્રમ્પે બંને વખત કોઈ પગલું લીધું નહીં. મે મહિનામાં તેઓ હુઆંગને પોતાની સાથે ચીન પણ લઈ ગયા હતા. છેલ્લા કેટલાક દિવસોમાં ટ્રમ્પે ઘણી વખત જાહેરમાં હુઆંગની પ્રશંસા કરી છે અને તેમના પ્રત્યે સહાનુભૂતિ વ્યક્ત કરી છે. ગુરુવારે સોશિયલ મીડિયા પર તેમણે હુઆંગને ‘દિગ્ગજ’ ગણાવ્યા હતા. ટ્રમ્પે હુઆંગ સાથેના સંબંધને અમેરિકા માટે ખતરો માન્યો નહીં ટ્રમ્પના નજીકના લોકોનું કહેવું છે કે જ્યારે રાષ્ટ્રપતિને ગુપ્તચર એજન્સીઓના અહેવાલ વિશે જણાવવામાં આવ્યું, ત્યારે તેમણે દેશની સુરક્ષા પરના તેના જોખમને વધુ ગંભીરતાથી લીધું નહોતું. તેમના એક સહયોગીના જણાવ્યા અનુસાર, ટ્રમ્પે આ સમગ્ર મામલાને માત્ર લગ્નેતર સંબંધો તરીકે જ જોયો. તેમને લાગ્યું નહોતું કે હુઆંગના આ મામલાથી અમેરિકાની સુરક્ષાને કોઈ ખતરો થઈ શકે છે. ટ્રમ્પના સહયોગીઓનું કહેવું છે કે રાષ્ટ્રપતિ Nvidiaને એવી કંપની માનતા હતા, જેને કોઈ પણ કિંમતે ડૂબવા દેવી ન જોઈએ. Nvidia દુનિયાની સૌથી મોટી કંપનીઓમાંની એક છે. વિશ્વની અર્થવ્યવસ્થામાં તેની મોટી ભૂમિકા છે. ચીનને પાછળ ધકેલીને AI ક્ષેત્રે અમેરિકાને સૌથી આગળ રાખવાનું ટ્રમ્પનું સપનું પણ ઘણું અંશે આ કંપની પર નિર્ભર હતું. ટ્રમ્પ હુઆંગને શા માટે બચાવવા માંગતા હતા? ટ્રમ્પના એક સલાહકારે જણાવ્યું કે રાષ્ટ્રપતિએ આ સમગ્ર મામલાને જે રીતે સંભાળ્યો, તેની પાછળ અનેક કારણો હતાં. સૌથી મોટું કારણ એ હતું કે ટ્રમ્પે હુઆંગ પર ઘણો વિશ્વાસ કરી લીધો હતો. તેઓ તેમને આજના યુગના હેનરી ફોર્ડ માનતા હતા. હેનરી ફોર્ડે અમેરિકામાં કાર બનાવવાના ઉદ્યોગને નવી ઓળખ આપી હતી. ટ્રમ્પને લાગતું હતું કે હુઆંગ પણ એવી ટેક્નોલોજી પર કામ કરી રહ્યા છે, જે આવનારા અનેક દાયકાઓ સુધી દુનિયાની દિશા નક્કી કરશે. ટ્રમ્પનું માનવું હતું કે Nvidiaની સફળતાની અસર અમેરિકાની અર્થવ્યવસ્થા અને શેરબજાર પર પણ પડે છે. જ્યારે સમાચાર આવ્યા કે કંપનીનું બોર્ડ હુઆંગને CEO પદેથી હટાવવાનો વિચાર કરી રહ્યું છે, ત્યારે ટ્રમ્પે પોતાના નજીકના લોકોને પૂછ્યું કે તેની શેરબજાર પર શું અસર થશે. તેમને ડર હતો કે હુઆંગને હટાવવાથી બજારમાં મોટો ઘટાડો આવી શકે છે. પહેલા ટ્રમ્પને એ પણ ખબર નહોતી કે Nvidia શું છે બાઇડન સરકારે જ્યારે અમેરિકન ચિપ્સ અન્ય દેશોને વેચવા પર કડક પ્રતિબંધો લગાવ્યા, ત્યારે હુઆંગે વોશિંગ્ટનની રાજનીતિ પર ધ્યાન આપવું પડ્યું. આ પછી પણ તેઓ અન્ય ટેક કંપનીઓના માલિકોની જેમ રાજકારણમાં વધારે સક્રિય થયા નહીં. એટલું જ નહીં, તેઓ ટ્રમ્પના બીજા શપથગ્રહણ સમારોહમાં પણ સામેલ થયા નહોતા. ટ્રમ્પ ઘણીવાર પોતાના નજીકના લોકોને કહેતા હતા કે તેમણે પહેલી વાર હુઆંગનું નામ કેવી રીતે સાંભળ્યું હતું. તેઓ કહેતા હતા, ‘આ કોણ છે? તેનું નામ શું છે?’ જ્યારે તેમને જણાવવામાં આવ્યું કે તેઓ Nvidiaના જેન્સન હુઆંગ છે, ત્યારે તેમણે પૂછ્યું હતું, ‘આ Nvidia શું છે?’ 2024ના અંત સુધીમાં ટ્રમ્પ સમજી ચૂક્યા હતા કે હુઆંગ Nvidiaના સૌથી મહત્વપૂર્ણ વ્યક્તિ છે. આ કંપની વિશ્વના સૌથી અદ્યતન AI મોડલ બનાવવામાં ઉપયોગમાં લેવાતી ચિપ્સના બજારમાં ઓછામાં ઓછો 80% હિસ્સો ધરાવતી હતી. બીજી તરફ, હુઆંગે પણ ટ્રમ્પની નજીક આવવાની તક જોઈ. તેઓ જાણતા હતા કે ટ્રમ્પ વ્યક્તિગત રીતે ધ્યાન આપનારા અને તેમની પ્રશંસા કરનારા લોકોને પસંદ કરે છે. પત્ની સાથે ટ્રમ્પના રિસોર્ટ પર ગયા હતા જેન્સન એપ્રિલ 2025માં હુઆંગ પોતાની પત્ની લૉરી સાથે ફ્લોરિડાના માર-એ-લાગો પહોંચ્યા હતા. ત્યાં ટ્રમ્પે ટેક્નોલોજી અને ક્રિપ્ટોકરન્સીના મોટા રોકાણકારો માટે ડિનરનું આયોજન કર્યું હતું. આ કાર્યક્રમમાં હુઆંગ પણ સામેલ થયા હતા. તે મુલાકાત બાદ ટ્રમ્પની તેમનામાં રસ વધ્યો. તે સમયે ટ્રમ્પ સાથે વાત કરનારા લોકોના જણાવ્યા અનુસાર, રાષ્ટ્રપતિને Nvidia વિશે જેટલી વધુ માહિતી આપવામાં આવી, તેટલા જ તેઓ પ્રભાવિત થતા ગયા. તેમને વારંવાર જણાવવામાં આવ્યું કે AI ક્ષેત્રમાં થઈ રહેલી પ્રગતિ મોટા ભાગે Nvidiaની ચિપ પર નિર્ભર છે. બાદમાં ટ્રમ્પે હુઆંગને કહ્યું હતું, ‘જેન્સન, તમે દુનિયા પર કબજો કરી રહ્યા છો.’ ટ્રમ્પ AI દ્વારા અમેરિકામાં નોકરીઓ વધારવા માંગતા હતા ટ્રમ્પને બીજા કાર્યકાળમાં AI દ્વારા અમેરિકામાં નવા ઉદ્યોગો અને નોકરીઓ વધારવાનો માર્ગ દેખાયો. AI માટે મોટા-મોટા ડેટા સેન્ટરો બનાવવામાં આવી રહ્યાં હતાં. તેમને ચલાવવા માટે મોટા પ્રમાણમાં વીજળીની જરૂરિયાત હતી. ટ્રમ્પને આશા હતી કે ડેટા સેન્ટર બનાવવા અને ચલાવવા માટે મશીનો, વીજળીના સાધનો અને બીજી વસ્તુઓ બનાવતી અમેરિકન ફેક્ટરીઓને પણ પ્રોત્સાહન મળશે. તેનાથી અમેરિકામાં મેન્યુફેક્ચરિંગ એટલે કે સામાન બનાવવાનું કામ વધશે અને અર્થતંત્રને મજબૂતી મળશે. તેમને લાગતું હતું કે AI અમેરિકાને ચીનથી આગળ રાખવામાં મોટી ભૂમિકા ભજવી શકે છે. આ જ કારણે તેઓ AI કંપનીઓના વડાઓને દેશના સૌથી મહત્ત્વના ઉદ્યોગપતિઓમાં ગણવા લાગ્યા હતા. તેમાં જૅન્સન હુઆંગ સૌથી આગળ હતા. ચીનને ચિપ વેચવાના મુદ્દે પણ ટ્રમ્પે જેન્સનની વાત માની હુઆંગ ઇચ્છતા હતા કે Nvidia પોતાની ચિપ વધુમાં વધુ દેશોને વેચે. તેમનું માનવું હતું કે જો અન્ય દેશો AI માટે અમેરિકન ચિપનો ઉપયોગ કરશે, તો તેઓ ચીનની ટેકનોલોજીને બદલે અમેરિકાની ટેકનોલોજી પર નિર્ભર રહેશે. વ્હાઇટ હાઉસમાં AI અને ક્રિપ્ટો સંબંધિત બાબતોના વડા ડેવિડ સૅક્સે પણ હુઆંગનું સમર્થન કર્યું. બંનેએ મળીને ટ્રમ્પને ચીનને ચોક્કસ પ્રકારની ચિપ વેચવાની મંજૂરી આપવા માટે રાજી કર્યા. આ નિર્ણય ટ્રમ્પના સમર્થકોને પસંદ નહોતો. તેમ છતાં ટ્રમ્પે હુઆંગ અને બીજી મોટી ટેક કંપનીઓના વેપારીઓની વાત માની. તેમાં ઓપનએઆઈ, મેટા અને સ્પેસએક્સ જેવી કંપનીઓ પણ સામેલ હતી. ટ્રમ્પે Nvidiaને ચીનમાં પોતાની કેટલીક ખાસ ચિપ્સ વેચવાની મંજૂરી આપી. તેના બદલામાં અમેરિકી સરકારે કંપનીની આ વેચાણમાંથી થતી કમાણીનો પહેલાં 15% અને બાદમાં 25% હિસ્સો લેવાની વ્યવસ્થા કરી. આ નિર્ણય પર અનેક લોકોએ સવાલો ઉઠાવ્યા. કેટલાકે તેને કાયદાકીય રીતે ખોટો ગણાવ્યો, તો કેટલાકે કહ્યું કે તેનાથી અમેરિકાની રાષ્ટ્રીય સુરક્ષા જોખમમાં મુકાઈ શકે છે. અમેરિકી પ્રશાસનના કેટલાક અધિકારીઓ પણ આશ્ચર્યચકિત હતા કે હુઆંગનો ટ્રમ્પ પર આટલો પ્રભાવ કેવી રીતે પડી ગયો. ———————–