વલસાડના તિથલ બીચ પર વડાપ્રધાનના ‘સેવા સંકલ્પ અભિયાન’ અંતર્ગત સ્વચ્છતા અભિયાન યોજાયું. વલસાડની શાહ એન. એચ. કોમર્સ કોલેજના NSS યુનિટના 26 વોલિયન્ટર્સ આ અભિયાનમાં જોડાયા હતા. આનો હેતુ જાહેર સ્થળોની સ્વચ્છતા જાળવવા અંગે જનજાગૃતિ કેળવવાનો હતો. NSSના વિદ્યાર્થીઓએ તિથલ બીચના અલગ-અલગ વિસ્તારોમાં શ્રમદાન કર્યું. તેમણે કચરો એકત્રિત કર્યો અને બીચ પર આવતા લોકોને સ્વચ્છતા અંગે જાગૃત કર્યા. વિદ્યાર્થીઓએ ‘સ્વચ્છતા એ સૌની જવાબદારી છે’નો સંદેશ આપ્યો. આ અભિયાનમાં આસિસ્ટન્ટ કલેક્ટર પિયુષભાઈ ઘટાલા અને તેમની ટીમ પણ હાજર રહી હતી. તેમની હાજરીથી વિદ્યાર્થીઓનો જુસ્સો વધ્યો. વિદ્યાર્થીઓએ તિથલ બીચ જેવા પર્યટન સ્થળને સ્વચ્છ અને સુંદર રાખવાનો સંકલ્પ લીધો. કાર્યક્રમનું આયોજન NSSના પ્રોગ્રામ ઓફિસર એમ. જી. પટેલ, ડૉ. પારસ શેઠ, ડૉ. નીલમબેન ઇટાળીયા અને ડૉ. સાપનાબેન રાવલ દ્વારા કરાયું હતું. કોલેજના ઇન્ચાર્જ આચાર્ય વી. આર. ચાંપાનેરીના માર્ગદર્શનથી આ અભિયાન સફળ રહ્યું.